Дагъустандин кьил В.Васильеван теклифдалди кардик акатнавай «100 мектеб» ва «150 мектеб» проектрин сергьятра аваз алатай йисуз Ахцегь райондин кьве мектеб ремонтна. Алай йисуз лагьайтIа, хкягъунин конкурсдик и райондин вад мектеб акатнава. И гьакъиндай «Дагъустан» РГВК-ди малумарна.

Ахцегь хуьруьн умуми образованидин мектебдин дарамат эцигайдалай инихъ саки 200 йис тамам хьанва. Къенин йикъалда ана тамамвилелди садрани ремонт кьиле фенвач. Гьелбетда, гьялна кIани месэлаяр гзаф кIватI хьанва. Руководстводи сифте нубатда лап четин, школьникрин уьмуьр патал хаталу дараматар къайдадик кутуниз фикир гудайвал я.

Ахцегьрин 2-нумрадин мектебдин гьаларни хъсанзавач. Аялрини, неинки ремонт авуник, гьакI цIийи тадаракарни хкуник умуд кутазва. Ина къав дегишунин месэла фадлай арадал атанва.

Райондин образованидин управленидин начальник Алмас Гьажиева къейдзавайвал, райондин саки вири мектебриз ремонт герекзава. ЦIуд йисаралди кIватI хьанвай месэлаяр хсуси къуватрихъ гьялиз хьунни мумкин туш.

«Лезги газет»