И мукьвара Москвада самбодай РФ-дин ХIII Кубок патал акъажунар кьиле фена. РФ-дин ФСИН-дин командадин кIватIалдик кваз Сулейман-Стальский райондин ДЮСШ-да самбодални дзюдодал машгъул хьайи пагьливан, Европадин акъажунрин гъалибчи ва приздин сагьиб, спортдин мастер, кьве сеферда дуьньядин чемпион (универсальный женгерай) Аслан Къурбановани акъажунра иштиракна. Идакай «Лезги газетдиз» Сулейман-Стальский райондин администрациядин пресс-къуллугъди хабар гузва.

Фикир желбдай женгерилай кьулухъ, акъажунрин нетижада чи ватанэгьли Аслан Къурбановакай гимишдин приздин сагьиб хьана. Алакьунар авай пагьливандихъ гележегда анжах къизилдин медалар къачудай гъалибвилер хьурай!

«Лезги газет»