Россиядин карчи, экономикадин илимрин доктор, регьимлу крарик кьил кутазвай меценат Михаил Гуцериева НТВ-да кьиле физвай «Ты супер!» телепроектдин финалдиз акъатай 12 бажарагълу жегьилдиз, гьа жергедай яз Махачкъаладай тир лезги руш Карина Исмаиловадизни квартираяр багъишда. Идакай «Лезги газетдиз» «ЛезгиЯр» милли порталди хабар гузва.
Миллиардерди финалдиз акъатай гьар садаз абур чеб яшамиш жезвай шегьерра квартира къачудайвал я. Адан гафар ван хьайила, сегьнедал акъвазнавай конкурсдин бажарагълу иштиракчийрин шадвилихъ кьадар амукьнач. Гьелбетда, ихьтин бейхабар савкьатдикай абуру гьич хиялни авунвачир.
«Алатай йисуз зи дуст композитор Игорь Крутоя гъалибчидиз квартира савкьатна. Адалай чешне къачуна, и йисуз зани финалдиз акъатайбур патал абур яшамиш жезвай шегьерра 12 квартира къачун кьетIна», — лагьана М.Гуцериева.
«Лезги газет»
