“Газпром межрегионгаз Махачкала” компанияди, чеб гуя газдин идарадин къуллугъчияр я лугьуз, агьалийрин кIвалериз физвай ва абур алцурарзавай тапан контролеррин луту-птувилин гьерекатрикай хабар гузвай дуьшуьшар эхиримжи вахтара гзаф хьанвайди къейдзава ва дикъетлу хьуниз эвер гузва.
Малум хьайивал, луту-птуяр, чеб идарадин къуллугъчияр я лугьуз, муьштерийрин са-са кIвализ физ, ишлемишнавай газдин гьакъи тади гьалда ва гъиляй-гъилиз це лугьуз гьавалат жезва. Идахъ галаз алакъа-лу яз, “Газпром межрегионгаз Махачкала” компанияди агьалийривай дикъетлу, мукъаят хьун тIалабзава. Компанияди рикIел хкизвайвал, контролерди абонентдин истемишуналди вичин къуллугъдин шагьадатнама къалурун чарасуз я. ГьакIни и ва я маса контролер газдин идарадин къуллугъчи яни, тушни чирун патал газдалди таъминарзавай карханадин чкайрал алай идарайриз зенг авуна чириз жеда (адресар ва телефондин нумраяр www.mkala-mrg.ru сайтда ава).
Идалайни гъейри, компанияди агьалийриз газдин идарадин гьакъикъи контролерризни и ва я маса къуллугърай нагъд пул тагун меслятзава. “Эгер куьн ихьтин дуьшуьшрал гьалтайтIа, тIалабзава абурукай тади гьалда полициядиз хабар гун”, — лугьузва малуматда.
Чи мухбир
