2019-йисан 17-майдиз 87 йисан яшда аваз МВД-дин генерал-майор, тарихдин илимрин кандидат, тIвар-ван авай общественно-политический деятель, чIехи ватанперес Шайдаев Гьажи-Къурбан Гьажибалаевич рагьметдиз фена.
Шайдаев Гьажи-Къурбан Гьажибалаевича жуьреба-жуьре жавабдар къуллугърал бегьерлудаказ зегьмет чIугуна. Адакай ВЛКСМ-дин Дагъустандин обкомдин отделдин заведующийдин заместитель, КПСС-дин Каспийск шегьердин комитетдин секретарь, Каспийскдин халкьдин депутатрин Советдин исполкомдин председатель, Каспийскдин аялриз тербия гудай колониядин начальник хьана. 1955-йисалай 1991-йисалди къенепатан крарин органра къуллугъна. Ада вичин зегьметдин рехъ, педагогвилин работник яз, 1952-йисуз башламишна. 1955-йисуз ам къенепатан крарин органриз, Каспийскдин аялриз тербия гудай колониядин начальниквиле кIвалахал ракъурна. Гуьгъуьнлай ам ДАССР-дин къенепатан крарин министрдин заместителвиле тайинарна. 1972-йисуз, Дагъустандин МВД-дин министрдин сад лагьай заместитель яз, ам Москва шегьердиз кIвалахал хутахна ва СССР-дин МВД-дин регьбервал гудай работникрин пешекарвал хкаждай Вирисоюздин институтдин начальниквиле тайинарна. Гьа и йисуз ада СССР-дин оборонадин министерстводин В.И. Ленинан тIварунихъ галай Военно-политический академияда тарихдин илимрин кандидатвилин диссертация хвена. 1976-йисуз чи ватанэгьлидиз къенепатан къуллугъдин генерал-майордин чин гана. Гьажи-Къурбан Гьажибалаевича институт кIвачел акьалдарунин карда иштиракна. 1972-йисуз РСФСР-дин МООП-дин зегьметдалди ахлакь туькIуьр хъийидай идарайрин регьбервал гудай ва инженерно-технический работникрин пешекарвал хкаждай учебно-технический пунктунин бинедаллаз тешкилай Институт къе, Россиядин МВД-дин пешекарвилин алава образование гудай государстводин идара яз, чи уьлкведин къанун-къайда хуьдай органар патал кадрияр гьазурдай халисан макандиз элкъуьник Гь.Гь.Шайдаеван хсуси лайихлу пай ква.
Гь.Гь.Шайдаев 1991-йисуз РФ-дин Президентдин патав Дагъустан Республикадин Гьамишалугъ векилвиле — Дагъустан Республикадин Гьукуматдин Председателдин заместителвиле тайинарна.
Гзаф йисара гьакъисагъвилелди зегьмет чIугунай Гь.Шайдаеваз Гьуьрметдин орден, “Дагъустан Республикадин вилик лайихлувилерай” орден, жуьреба-жуьре медалар ганва. Гь.Гь. Шайдаев СССР-дин МВД-дин лайихлу работник, Дагъустан Республикадин государстводин гражданвилин къуллугъдин лайихлу работник, Каспийск шегьердин, Сулейман-Стальский райондин ва Цмуррин хуьруьн Гьуьрметлу гражданин я.
Багъри Ватандихъ халисандиз рикI кузвай кас тир Гьажи-Къурбан Шайдаеваз гзаф йисарин гьакъисагъ зегьметдай ва активдаказ общественный кIвалах тухунай Дагъустан Республикадин шабагь тир “Хайи чил кIан хьунай” Гьуьрметдин лишан ганва.
Чна Гьажи-Къурбан Гьажибалаевич Шайдаеван хизандиз, вири багърийриз, дериндай хажалат чIугуналди, башсагълугъвал гузва.
Сулейман-Стальский райондин администрация, райондин депутатрин собрание
