И йикъара Белиж поселокдин стадиондал Ватандин Чlехи дяведа Гъалибвал къазанмишна 74 йис тамам хьуниз талукьарна, поселокдин школайра кlелзавай жаванрин арада велоспортдай ачух турнир кьиле тухвана. Ам башламишдалди мярекатдиз кlватl хьанвай иштиракчийри стадиондилай поселокдин центрадал кьван ва элкъвена кьулухъди велосипедар гьална.
Турнир ачухуниз талукь мярекатда РД-дин велоспортдин Федерациядин президент Мегьамедали Багандова, кьилин тренер Мурад Омарова, Белиж поселокдин кьил Рамиз Гьабибулаева, мярекатдиз къаюмвал авур бязи карчийри иштиракна.
Турнирдин иштиракчияр тебрик авуналди мярекат Рамиз Гьабибулаева ачухна. Ахпа анал Магьамедали Багандов, поселокда кардик квай велоспортдин “Леки” клубдин регьбер, и турнирдин тешкилатчи Радик Апаев ва масабур рахана. Абуру велоспорт олимпиададин къугъунрик квайдакай, сагълам уьмуьр тухун патал спортдин и жуьредихъ авай метлебдикай лагьана ва иштиракчийрихъ агалкьунар хьун алхишна.
Ачух турнирда яшарин кьуд категориядай вишелай гзаф велосипедистри чпин устадвал къалурна. Къизгъиндиз кьиле фейи акъажунра спортсменри агъадихъ галай нетижаяр къазанмишна:
2002-2003-йисара ханвайбурун арада Жалал Регьимханова (4-нумрадин СОШ)-1, Салман Салманова (гимназия) — 2, Равид Халикьова (СОШ № 4) 3-чкаяр кьуна.
2004-2005-йисара ханвайбурун арада Рамазан Идрисова -1, Алим Салигьова — 2, Новруз Мегьамедова (вири гимназияда кIелзавайбур) 3-чкаяр кьуна.
2006-2007- йисара ханвайбурун арада Герман Салманова — 1, Азим Салигьова — 2, Гьарун Шабанова (вири гимназияда кIелзавайбур) 3-чкаяр кьуна.
2008-2009-йисара ханвайбурун арада Къурбан Рамазанова (4-нумрадин СОШ) — 1, Иман Бабаева (1-нумрадин СОШ) — 2, Рустам Гьабибулаева (3-нумрадин СОШ) 3-чкаяр кьуна.
Кьилдин призриз Рашид Селимов ва Амин Мегьамедов (Г.Лезгинцеван тlварунихъ галай школа) лайихлу хьана.
КIвенкIвечи чкаяр кьурбуруз кубокар, медалар ва къиметлу пишкешар гана.
Эхирдай поселокдин администрациядин ва “Леки” клубдин тlварцlихъай Р.Апаева турнирдиз къаюмвал авурбурув чухсагъулдин чарар вахкана.
Къагьриман Ибрагьимов
