Са тIимил йикъар идалай вилик Калмыкияда, тIебиат хуьниз талукь “Тюльпанрин фестиваль” суварин сергьятра аваз, “Дуьзенлухда дуствилин сес хкаж хьанва” фольклордин регионрин уртах фестиваль кьиле фена. Ам Калмыкиядин дуьзенлухра тамун тюльпанри цуьк авурла кьиле тухузва. Мярекатдин кьилин макьсад Россиядин Федерациядин Яру ктабда гьатнавай алай аямдин тюльпанрин улу-бубайрин (адаз Геснеран (Шренкан) жинс лугьузва) сорт хуьнал общественностдин фикир желбун тир. Фестивалдин йикъара республикадиз дуьзенлухдин гуьрчегвилел гьейран агъзурралди туристар атанвай…
“Дуьзенлухда дуствилин сес хкаж хьанва” фольклордин регионрин уртах фестиваль Россиядин культурадин ирс хуьнин, яратмишунин шартIар девлетлу авунин ва, художественный рекьяй майданар гегьеншаруналди, миллетрин алакъаяр кьадайвал туькIуьрунин макьсаддалди тухузва. Адан сергьятра аваз мугьманриз Волгоградский, Астраханский, Ростовский областрин, гьакIни Дагъустан, Къазахстан ва Калмыкия республикайрин яратмишунардай коллективрин устадвал, Калмыкиядин хуьруьн майишатдин гьайванрин выставка, сеняткаррин мекера ва икI мад аквадай мумкинвал хьана.
Фестивалда Мегьарамдхуьруьн райондин фольклордин “Ялцугъ” ансамблдини иштиракна. Адан регьбер Дагъустан Республикадин лайихлу муаллим Рустам Надирович Къарибов я. Коллективдик Советский хуьруьн юкьван школадин муаллимар, райондин культурадин отделдин къуллугъчияр квай. Лезги халкьдин манийрикай ибарат тир абурун программа кIватI хьанвайбуру хушвилелди кьабулна.
Калмыкиядиз фин патал коллективдиз Мегьарамдхуьруьн райондин кьил Фарид Агьмедова куьмек гана. Фольклордин регионрин уртах фестивалда иштиракунай адаз, гьакIни “Ялцугъ” ансамблдин коллективдиз Калмыкиядин культурадин министерстводин, РДНТ-дин патай чухсагъул малумарна.
Чи мухбир
