Дагъустандин культурадин министерстводи и йикъара кьве фестиваль — адетдин культурадин центрайрин “Зи Ватан-Россия” лишандик кваз терроризмдиз аксивал авуниз талукьарнавай фестиваль ва республикадин халкьдин яратмишунрин “Россия-зи Ватан” фестивалдин зонадиз талукь пай кьиле тухвана. Дербентда Лезгийрин госмуздрамтеатрда кьиле фейи мярекатрин программа Мегьарамдхуьруьн, Ахцегь ва Рутул районрин халкьдин театррин сегьнейрикай ибарат тир. ИкI, Мегьарамдхуьруьн райондин халкьдин театрдин иштиракчийри «Дяведиз рекье тун» сегьне къалурна. Ролра Изам Улубегов (Магьмуд), Садагет Саидова (Перистан), Билал Эскендеров (Аскеран хва), Жульета Омарова (Бикедин руш), Фероза Улубегова (почтальонка Мапери) къугъвана.
Фестивалдин вири иштиракчияр Дагъустандин культурадин министерстводи акьалтзавай несилдиз ватанпересвилин, руьгьдинни ахлакьдин тербия гунай дипломралди къейдна. Мегьарамдхуьруьн райондин театрдин коллективдиз залда авай тамашачийри лайихлу къимет гана.
Гуьгъуьнлай сегьне хореографиядин коллективрин ва манидаррин (вокальные исполнители) — республикадин халкьдин яратмишунрин “Россия-зи Ватан” фестивалдин зонадиз талукь паюнин иштиракчийрин ихтиярда вугана. Агъул, Ахцегь, Дахадаев, Докъузпара, Дербент, Къайтагъ, Кьурагь, Мегьарамдхуьруьн, Сулейман-Стальский,Табасаран, Хив районрин, Дагъустандин Огни ва Дербент шегьеррин артистри чпин устадвал къалурна. ИкI, фестивалда Мегьарамдхуьруьн райондин патай Айдун Мегьамедов, Эсфира Хаспулатова ва Тагьирхуьруьн-Къазмайрин искусствойрин школадин хореографиядин коллектив сегьнедал экъечIна.
Фестивалдин иштиракчийрин устадвилиз вичин составдик Россиядин искусствойрин лайихлу деятель, профессор, “РД-дин музыкантрин Союз” РОО-дин председатель Хан Баширов, Дагъустандин искусствойрин лайихлу деятель, ДГПУ-дин музалатрин ва манияр лугьунин рекьяй кафедрадин профессор, Россиядин гьукуматдин, “Дагъустандин руьгь” премийрин лауреат Юрий Ханжов, “Дагъустандин правда” газетдин культурадин отделдин редактор Светлана Кривоносова, искусствовед, РДНТ-дин пешекар Татьяна Петенина, Россиядин писателрин Союздин член, РДНТ-дин пешекар Багьаудин Узунаев ва хореограф, РДНТ-дин пешекар Наби Салаватов квай комиссияди къимет гана.
Фестивалдин иштиракчийри сегьнедилай милли чIаларал ватанпересвилиз, Дагъустандин гуьрчегвилиз, Ватан кIан хьуниз талукь шиирар кIелна, манияр лагьана, аялрин хореографиядин коллективри кьуьлер тамамарна.
Виридалайни хъсан коллективри 12-июндиз — Россиядин Йикъаз талукь яз Махачкъалада “Россия — зи Ватан” лишандик кваз кьиле тухудай гала-концертда иштиракда.
«Лезги газет»
