Гъалибвилин суварин вилик, 8-майдиз, Ахцегь райондин кьил Осман Абдулкеримов кьиле авай дестеди Кьакарин хуьре яшамиш жезвай Ватандин ЧIехи дяведин иштиракчи Исмаилов Наби Азизагъаевичал кьил чIугуна. И гьакъиндай «Лезги газетдиз» райадминистрациядин пресс-къуллугъди хабар гана.

Гьуьрметлу мугьманрин арада РД-дин счетный палатадин председатель Билал Жагьбаров, РД-дин хуьруьн майишатдин виликан министр Керимхан Абасов, Ахцегьа авай сергьятар хуьнин частунин командир Равиль Хисаметдинов, УКСМПиТ-дин начальник Къистер Гъаниева, УСЗН-дин начальник Алаудин Имамов, КЦСОН-дин директордин везифаяр тамамарзавай Мурад Алирзаев ва масабур авай.

Б.Жагьбарова ветерандиз РД-дин кьил В.Васильеван патай сувар тебрикна ва пулдин пишкеш вахкана. Тебрикдин гафар райондин кьили ва муькуь мугьманрини лагьана. Абуру ветерандиз чандин сагъвал ва яргъи уьмуьр хьун алхишна. Дагъустандин халкьдин артистка Цуьквер Мамедовади ветеран патал халкьдин мани тамамарна. Аялрини шиирар, манияр тамамаруналди ветерандин гуьгьуьлар шадарна.

«Лезги газет»