“Дагъустан” ГТРК-дин журналист Хатима Нисредовадикай “Дуьзвал ва адалатлувал” журналистрин кIвалахрин Вирироссиядин 5 конкурсдин лауреат хьана.
“Дагъустан” ГТРК-дин махсус корреспондент Хатима Нисредовади конкурсдиз, ОНФ-дин пресс-къуллугъди хабар гузвайвал, къулай шартIарин чка яратмишунин, экологиядин ва образованидин месэлайриз талукь материалар вугана. Кьве турдин нетижайрал асаслу яз ва Общественный Советдин къарардин бинедаллаз адакай регионрин ва чкайрин аслу тушир СМИ-рин тереф хуьнин “Дуьзвал ва адалатлувал” фондунин журналистрин кIвалахрин конкурсдин лауреат хьана.
Конкурсда иштиракун патал регионрин печатдин ва электронный СМИ-рин векилрилай, телерадиокомпанийрилай, гьакIни Россиядин 85 региондай тир блогеррилай 2,5 агъзур арза атана. Санлай къачурла, конкурсантри “Яшайиш ва къулай шартIарин чка”, “Экология”, “Здравоохранение”, “Образование”, “Культура”, “ГъвечIи ва юкьван карчивал ва кьилдин ксарин карчивилин инициатива хуьн” ва маса номинацийрай вад агъзурдалай гзаф хци ва гьялун лазим тир материалар агакьарна.
Хатима Нисредова патал ОНФ-дин фондунин “Дуьзвал ва адалатлувал” премия — им сад лагьай награда туш. Виликрай адан журналиствилин кIвалах, яратмишунра авай агалкьунар ва виниз тир пешекарвал публицистикадай РД-дин Государстводин премиядалди, Дагъустандин журналистрин Союздин “Къизилдин лекь” премиядалди ва РД-дин Общественный палатади тешкилнавай республикадин гьар йисан “Халкьдин журналист” премиядалди къейдна.
Журналистрин кIвалахрин “Дуьзвал ва адалатлувал” 5-конкурсдин гъалибчийрив наградаяр 14-17-майдиз Сочида кьиле фидай Медиафорумдин шадвилин мярекатдал вахкуда. Алакьунар авай бажарагълу руш Сулейман-Стальский райондин Эминхуьряй я.
Чи мухбир
