7-майдиз Дагъустан Республикадин Гьукуматдин Председателдин заместитель Рамазан Жафарован регьбервилик кваз рекьера гьерекатдин хатасузвал таъминарунин месэлайрай РД-дин Гьукуматдин комиссиядин заседание хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
2019-йисан сад лагьай кварталдиз республикадин рекьера аварияр арадал атунин жигьетдай аваз хьайи гьалдин ва абурун кьадар тIимиларунин макьсаддалди кьабулзавай серенжемрин гьакъиндай доклад МВД-дин РД-да авай УГБДД-дин начальник Александр Шалагина авуна.
Республикадин кьилин госавтоинспекторди къейд авурвал, 2019-йисан 1-апрелдин делилралди, 2018-йисан талукь тир девирдив гекъигайла, рекьера транспортдихъ галаз алакъалу аварийрин кьадар 20 процентдин, ахьтин дуьшуьшрик телеф ва хер хьайи ксарин кьадар, талукь тирвал, 34 ва 19 процентдин тIимил хьана.
Республикадин Госавтоинспекциядин регьберди региондин “Рекьерин сеть” проект кьилиз акъудунив мадни мукьуфдивди эгечIун лазим тирдал фикир желбна. А проектдал асаслу яз, рекьер капитальнидаказ ремонт авун, цIийикIа туькIуьр хъувун, гьакIни 98 объектдал рекьерин гьерекат тешкилун герек я. Абурун арада Махачкъала шегьердин агломерациядин куьчейринни рекьерин сетдик акатзавай 95 объект ва Махачкъаладин агломерациядин къурулушдик квай кьве рехъ — Манас-Зеленоморск-Аэропорт ва автомобилрин Махачкъала-Каспийск-Аэропорт рекьелай ЦIийи Хушет поселокдиз кьван фенвай рехъ ва региондин дережадин Мегьарамдхуьр-Ахцегь-Рутул рехъ ава.
Гуьгъуьнлай Рамазан Жафаров пассажирар тухунин хатасузвал таъминарунин жигьетдай гьалар пайгардик кутун патал кьабулзавай серенжемрин гьакъиндай хабардарна.
Заседанидал пассажирар ва парар чинеба тухунин дуьшуьшрихъ галаз женг чIугуниз, кьилди къачуртIа, таксийра аваз пассажирар тухун тешкилунин кIвалахдиз талукь месэлайризни килигна.
Докладчийри къейд авурвал, таксидиз эвер гунин жигьетдай хабардар авунин къуллугъар теклифзавай “агрегаторар” лугьудайбурун кIвалахдихъ галаз алакъалу месэла иллаки хцидаказ вилик акъвазнава. ГьикI хьи, водителдихъ пассажирар тухудай ихтияр авани, авачни, гьа кар, зегьметдин ва ял ягъунин къайдайрал амал авун, водителдин сагъламвал, автомобиль технический жигьетдай авай гьал фикирда кьазвач. Гзаф дуьшуьшра водителрихъ галаз икьрарар кутIунунин барадай тайинарнавай къайдайрал амал ийизвач.
Заседанидал рекьера гьерекатдин хатасузвал таъминарунин барадай массовый информациядин такьатрин мумкинвилерикай менфят къачунин месэлани веревирдна.
Заседанидин нетижаяр кьур РД-дин Гьукуматдин Председателдин заместитель Рамазан Жафарова са жерге шегьеррин ва районрин кьилерин фикир аварияр хьунин дережа агъузарунин барадай энгел ийиз тежер серенжемар кьабулунал кьетIендаказ желбун тапшурмишна.
«Лезги газет»
