Россиядин Федерациядин ва Дагъустан Республикадин культурадин лайихлу работник, “Россиядин ватанперес” гьуьрметдин тIварцIин, “Знак Почета” ордендин иеси, Ахцегь райондин дяведин, зегьметдин, къайдаяр хуьдай органрин ва Яракьлу Къуватрин ветеранрин советдин кьиле яргъал йисара акъвазай баркаллу хва Шефиев  Жамал  Азизович  дидедиз хьайидалай инихъ  90 йис тамам жезва.

Ада вичин вири уьмуьр Ватандиз намуслувилелди къуллугъ авуниз, жемят патал­ хъсан крар тамамаруниз, акьалтзавай несилдиз гражданвилин ва ватанпересвилин тербия­ гуниз, Ватандиз  лайихлудаказ къуллугъдай къанажагъ арадал гъуниз серфна. Гьави­ляй адан зегьмет гьукуматди шабагьралди ва ла­­йих­лу тIварар гуналди къейдна. Же­гьил­-жаванар  ватанпересвилин  руьгьдаллаз тербия­ламишунин кIвалах вилик жергейра хьуналди­, Ахцегь райондин культурадин отделдин заведующий, ахпани вичин гъилералди арадал гъайи культурадинни искусстводин музейдин директор хьуналди, ада же­гьил­рин, вири агьалийрин къанажагъда Ватан  хуьнин, кIан хьунин, игитвилин тарихдин сагьиб тир уьлкведин лайихлу рухваяр  хьунин идеяяр туна.

Культурадинни искусстводин музейда Ж.Шефиева районэгьлийрин ва уьлкведин баркаллу крариз бахшнавай стендар, пипIер, альбомар, ктабар ава. “Зегьметдин баркалладин ва женгинин пIипI”, “Ватанпересвилин тербиядин зал” иллаки  фикир желбдайбур я. Ина Кьиблепатан Дагъустандин районриз талукь10 агъзурдалай виниз экспонатар ава. Ватандин ЧIехи дяведин фронтра викIегьви­лел­ди женгер чIугур ва гьакI телеф хьайи ах­­­цегьвийриз талукьарнавай стендарни гзаф ава. Музейдиз къвезвайбуруз фронтдай аскерри чпин багърийриз рекье хтур пуд пипIен ча­рари, командирри абурун гьакъиндай кхьенвай разивилин гафари, фронтовикрин шикилри таъсирзава. Ина къенин несилдиз, хтулриз, птулриз чпин чIехи бубайри, улу-бу­байри душмандикай Ватан хуьн патал гьикI женг чIугунатIа, малум жезва.

Музейда фадлай кардик квай “Гьич са касни, гьич са затIни рикIелай фенвач”, “Хизанлух Ватан хвейи ксар”, “Дагъустанвияр — Советрин Союздин Игитар”, “Халкьни Армия сад я”, “Хайи Ватан хуьн”, “Ватандин ЧIехи дяведин йисара телеф хьайи Дагъустандин шаирар ва писателар”, “ЧIехи Гъалибвилин 70 йис”, “РикIел хуьнин ктаб”, “Ватандин аскерар ктаб” стендар гзаф кьадар малуматрикай, делилрикай ибарат я. Ахцегь райондай акъатнавай Советрин Союздин Игитар тир Валентин Эмироваз ва Гьасрет Алиеваз кьилдин пипIер туькIуьрнава. Музейда алай вахтунда Россиядин Армияда къуллугъзавай аскерриз талукь пIипIни ава.

Акьалтзавай несилдиз женгининни ватанпересвилин тербия гунин кардик еке пай куту­най ва ветеранрин гьерекатда активвилелди иш­тирак авунай Россиядин дяведин ва женгинин къуллугъдин ветеранрин комитетдин председатель, армиядин генерал, Ватандин ЧIе­хи дяведин активный иштиракчи Владимир­­ Говорова Шефиев Жамалаз “Дяведин ва женгинин къуллугъдин ветеран” медаль ганай.­

Къейд авун лазим я хьи, Жамал Азизови­ча Ахцегь райондин культурадин кIвале гьеле 1971-йисуз “Дяведин ветеранрин клуб” тешкилнай. Аниз датIана Ватандин ЧIехи дя­ведин женгера иштиракай фронтовикриз теклифдай. Абурухъ галаз жегьилрин гуьруь­шар­ тешкилдай. Гьа са вахтунда Шефиева ветеранриз яшайишдин месэлаяр гьялунин кардани куьмекардай. Райондин талукь идарайрихъ галаз меслятар ийидай. Анжах 15 йис алатайла, “Дяведин ветеранрин клубар” Союздин маса регионрани тешкилиз гатIунна.

Дяведин ва Зегьметдин ветеранрин советдин председатель тир вахтунда Ж.Шефиева Ахцегь райондин  военкоматдихъ, пограничникрин дестедихъ, хуьрерин администрацийрин кьилерихъ, культурадин, образованидин идарайрихъ галаз датIана алакъа хуьдай, Ва­тан­ хуьзвайбурун  йикъариз, Гъалибвилин су­ва­риз, пограничникрин йикъариз талукь  ри­кIел­ аламукьдай мярекатар санал тешкил­дай­.

Гьар йисуз 9-Майдиз Ж.Шефиева туь­кIуьрнавай сценарийдин бинедаллаз райондин центрада сувариз талукьарнавай мярекатар кьиле тухудай. И мярекатра райондин саки вири хуьрерин  векилри иштиракдай.

Районда кьиле тухузвай гьар са карда вичин активвал къалурзавай ва чкадал кьиле физвай крарин гъавурда хъсандиз авай Жамал Азизовича жегьилар армиядиз финиз гьазуруниз, абур рекье туниз датIана еке фикир гудай. Райондин культура­дин кIва­ле “Жегьил аскердин университет” кардик квай. Гьар йисуз аниз 200-далай виниз школьникар, жегьилар къведай. Ина тежрибалу ветеранри, военкоматдин векилри, пограничникри жегьилар армиядин адетрихъ, шартIарихъ галаз танишардай, абурухъ галаз­  теориядин, тежрибадин, яракьар чирунин тарсар тухудай.

Гьар йисан гатфариз ва зулуз Советрин Союздин Игит Валентин Эмирован тIвару­нихъ галай паркуна жегьилар армиядиз рекье тунин мярекатар тешкилдай. Гьелбетда, армиядиз физ гьазур хьанвай жегьилриз камалдин, меслятдин сифтегьан гафар Жамал Азизовича лугьудай. Райондин гьуьрметлу, баркаллу ксари рикIел аламукьдай насигьатар гана, шад гьалара рекье твазвай жегьилри армияда тарифдай саягъда къуллугъни ийизвай. Идан гьакъиндайни частарин командиррилай хквезвай чарари шагьидвалдай. И чарарикай хейлинбур культурадинни искусстводин музейдани ава.

РикIел хкун лазим я хьи, Гъалибвилин 20 йисан юбилейдин вилик Ватандин ЧIехи дяведа телеф хьайибур рикIел хуьдай стела­ эцигуник кьил кутурдини Жамал Азизович­ тир. Ам ишлемишиз вахкудайла, суварин юкъуз а вахтунда гьеле чан аламай Советрин Союздин Игит Гьасрет Алиевни раханай ва ада Ше­фиеваз рикIин сидкьидай сагърай лагьанай. Гъалибвилин 40 йисан юбилейдин вилик Шефиеван теклифдалди стела туькIуьр хъувуна­ ­ва райцентрада мемориальный зурба комплекс хкажна. Ам Ватандин дяведин орден алай стеладикай, женгера те­леф хьайи вири ахцегьвийрин тIварар кхьенвай цлакай, эбеди цIукай ибарат я. Шефиеван теклифдалди райондин маса хуьрерани обелискар эцигна.

Ахцегьрин культурадинни искусстводин музейдиз гзаф инсанар къвезва ва абуру талукь ктабда чпин кхьинар тазва. 2001-йисан 15-январдиз музейдиз Россиядин гьуьлерин дяведин флотдин главнокомандующий, флот­дин адмирал Владимир Куроедов атанай. Му­зейда авай кьван экспонатар акурла, ада директордиз икрам авуналди сагърай ла­гьа­най ва адаз рикIел аламукьдай знакни ганай.

Ахцегьвийри чпин баркаллу хва Жамал Азизович  гьамиша рикIера хуьда.

Назир Тажибов