7-майдиз Махачкъаладин “Россия — зи тарих” тарихдин паркуна “Ватандин ЧIехи дяведин вакъиайриз ва Гъалибвилин 74 йис тамам хьуниз бахшнавай Вирироссиядин серенжем — “Гъалибвилин диктант” кьиле фена. Мярекатда РД-дин Гьукуматдин Председатель Артем Здунова, Халкьдин Собранидин Председателдин Сад лагьай заместитель Сайгидагьмед Агьмедова, республикадин Гьукуматдин членри, гьакIни общественный тешкилатрин, образованидин идарайрин векилри ва масабуру иштиракна.
Артем Здунова кIватI хьанвайбуруз Гъалибвилин сувар мубаракна ва къейдна хьи, ихьтин мярекатри акьалтзавай несил уьлкведин тарихдин игитвилин асирдиз мукьва ийизва.
“Им халкьдин дяве тир ва вирида рикIел хвена кIанда хьи, тарихдин вакъиайрикай гьихьтин хьайитIани чирвилери чун игитвилин а асирдиз мукьва ийизва. Ихьтин несил, чирвилер аваз, чавайни игитвилер ийиз жедайдак умуд кутаз жеда”, — къейдна А.Здунова.
Сайгидагьмед Агьмедова советрин халкьдин игитвал рикIел хуьнин важиблувал къейдна.
Ахпа инструктаж кьиле тухвана, адалай гуьгъуьниз кIватI хьанвайбур “Гъалибвилин диктант” кхьинив эгечIна.
Диктант кхьенвай тест тир, ана гьар са суалдиз жавабдин кьуд жуьре къалурнавай. Ам кхьин патал 45 декьикьа гузвай. Нетижаяр12- июндиз кьада. Гъалиб хьайибур кьве дережада тайинарда — региондин ва федеральный.
Къейд ийин хьи, диктант Россияда — 1233 ва къецепатан уьлквейрани 23 майдандал кьиле фена. Диктант кхьина 50 агъзурдалай гзаф ксари иштиракна.
Дагъустанда 13 муниципалитетда 17 майдан тешкилнавай, диктант кхьина 3 агъзурдалай виниз ксари иштиракна.
Чи мухбир
