Ватандин ЧIехи дяведин цIаяра Докъузпара райондин Къалажухрин хуьряй 138 касди иштиракна. Абурукай 63 кьегьалди ватан патал чпин чанар къурбандна.
Ватан фашистрикай азад авунин женгера къалажухвийрини кьегьалвилер къалурна. Кьилди къачуртIа, капитанар хьайи Султан Агъабалаева, Челеби Селимова, Филядин Седрединова, старший лейтенант, политрук Пирим Жаватова, лейтенант, танкунин командир Али Эмиралиева, старший лейтенант Шихбуба Сардарова, лейтенант Азай Шамилова ва хейлин масабуру Гъалибвилик чпин пайни кутуна.
Гьайиф хьи, дяведин ветеранрин кьадар йисалай-суз тIимил жезва. Докъузпара районда амайди анжах са ветеран я — къалажухви Атамов Межид Салигьович. 17 йисан яшда аваз дяведин ялавар акур, барутдин ни чIугур, рикIе гъалибвал къачунин къаст аваз, жуьрэтлувал къалурай аскерди четин йисара кьилел атай дуьшуьшрикай таъсирдайвал суьгьбетарда, рикIел хкида.
Ам 1925-йисуз дидедиз хьана. 7 йисан мектеб акьалтIарай жаван 1943-йисуз фронтдиз рекье гьатна. Аскерди СССР-дин ПВО-дин 57-зенитный дивизионда къуллугъна. Ам “Германиядин винел гъалибвал къачунай”, “Кавказ оборона авунай”, “Жуьрэтлувиляй” медалрин сагьиб я.
Куругъли Ферзалиев
