Пак Къуръанда лагьанва (мана): “Эй иман гъанвайбур! Чна куь хиве сив хуьн тунва, квелай вилик хьайибурун хиве турвал, белки, квез Аллагьдихъай­ кичIе жедатIа” (“Аль-Бакъара” сурадин 183-аят).

Гьуьрметлу мусурманар! Алай йисуз Рамазандин варз тахминан 6-майдиз алукьзава (дуьздаказ анжах цIийи варз вилералди акурла, тайин жеда). Къуй Аллагьди чаз и вацра вири сивер хуьдай, ибадатар ийидай, садакьаяр пайдай мумкинвал гурай. Къуй Аллагьди чун чи нефсерин ва чIуру амалрин писвиликай хуьрай! Къуй Рамазандин вацран  гьуьрметдай Аллагьди чи хийир-дуьайриз жаваб гурай ва гунагьрикай хуьрай! Амин.

Сив хуьнихъ авай гьикмет

Сив хуьн — им Аллагь-Таалади чи хиве тунвай иба­­дат я. Сив хуьз ва маса ибадатар тамамариз баш­ламишдалди, инсанди Аллагьдин разивал  къа­­­занмишун патал ният авуна кIанда.

Вичин хиве  тунвай  везифайрин  гьакъикъивал кьатIайдалай кьулухъ адаз абурун сирерни чирдай­ ихтияр ава. Аллагь -Таалади адан хиве  анжах чпихъ дерин мана авай шейэр тунва, лукIраз и кардикай гьатта хабар авач.

Сив хуьн  хиве тунихъни гьикмет ва дерин мана ава:

1. Сив хуьзвай касдин рикIел гьамиша Аллагь жеда. Месела, гьар гъилера адаз нез ва я хъваз кIан хьайила, адан рикIел вичи сив хуьзвайди ва Аллагьди сив чIурзавай амалар къадагъа авунвайди хкведа. Аллагь-Таала гьамиша рикIел хьуникай ва Ада вич ахтармишзавайди чир хьуникай авай хийирдикай гьатта рахун герек къвезвач.
2. Сив хуьдайла, беден кьезил ва фикирар ачух, Аллагь-Тааладиз ибадат авун регьят ва хуш жезва­. Гьадисда лагьанва: “Сив хуьн ибадатдин варар я”.
3. Гьамиша тухзавай инсандин рикI къванциз эл­къвезва, къилих векъи жезва. И сифетри маса, ге­нани пис сифетар, месела, зулум авун, ягъалмиш­ хьун, диндай акъатун ва масабур арадал гъизва. Сив хуьни идаз манийвалзава.
4. Тухзавай инсандиз гишинвал вуч ятIа чизвач­, гьавиляй адавай гишинзавай инсарин гьал кьатIузни  жедач. Сив хуьзвай инсандин рикIе гишинзавайбуруз талукь яз регьим арадал къвезва, абуруз  куьмек­ гуз  кIан жезва. И кар себеб яз мусурманрин арада кIанивал ва регьим чкIизва.
5. Шариатди чирзава хьи, сив хуьн — им неинки тIуь­никайни хъуникай жув магьрум авун, гьакIни мез гъибетдикайни буьгьтендикай, вилерни япар гьарамдиз килигуникайни адаз яб гуникай, беден чарадаз зиян гуникай хуьн я.
6. Вири дуьньяда каш гуналди на­­­­чагъвилер са­гъа­рунин къайда ишлемишзава. Пай­гъам­­­барди адакай гьеле 1400 йис идалай вилик­ ла­­­гьа­най: “Сагъ жедайвал, куьне сивер хуьх” (ТIаба­рани).
7. Инсандин виридалайни еке бедбахтвал ада дуьньядин няметриз, гьайванвилин гьевесриз къуллугъун я. Сив хуьни гьа и гьевесрихъ галаз  женг тухудай къуват гузва.

«Ас-салам» газетдай