Къенин ихтилат Америкадин Делавэр штатда яшамиш жезвай, вичихъ зурба бажарагъ авай чи ватанэгьли Селим Азимович Селимовакай я. Ам тIвар-ван авай шаир, писатель, литератор, филологиядин илимрин доктор, профессор ва Делавэрдин университетдин сенатдин президент я.
С.Селимов 1963-йисуз Махачкъалада муаллимринни искусстводин деятелрин хизанда дидедиз хьана. Адан буба Азим Агъахановича Дагъустандин университетда урус чIалан диалектологиядин тарсар гана; диде Людмила Селимовади Дагъустандин телевиденида “Алло, чун бажарагърихъ къекъвезва” передача кьиле тухвана. Селиман чIехи буба Агъахан Селимовни вичин вахтунда тIвар-ван авай кас тир.
Бажарагълу шаирдиз шииррин “Эверун” кIватIалдай Виктория Урбанодин машгьур премия гана. Селим Селимован къелемдикай хкатнавай литературадин макъалаяр, ктабар Испанияда, США-да, Канадада, Кьиблепатан Кореяда ва Азербайжанда чапдай акъатнава.
Селим Селимова 1986-йисуз Дагъустандин университет куьтягьна, 1986-1989-йисара Куба республикадин яракьлу къуватрин министерстводин международный алакъайрин отделда военный таржумачи яз кIвалахна. 1990-йисуз Америкадин Делавэр штатдин университетдин магистратурадик, гуьгъуьнлай Пенсильваниядин университетдин аспирантурадик экечIна.
1996-йисуз ада филологиядин илимрин доктордин дережа хвена. Делавэрдин университетда испан чIалан ва латиноамериканский литературадин тарсар гузва. 2008-2010-йисара ам Делавэрдин университетдин сенаторвиле, 2010-2012-йисара сенатдин президентвиле хкяна.
Чи ватанэгьли Америкадин шаиррин академиядин, Боливиядин художникрин ва писателрин Союздин, Делавэрдин демократический партиядин координационный комитетдин член, ЮНЕСКО-дин культурадин гьуьрметлу векил я.
Гьеле жаван вахтарилай ада урус чIалал шиирар кхьиз башламишна. Исятда ам са шумуд ктабдин автор я. Мадрид шегьерда авай машгьур “Вербум” чапханади акъудай “Окна в другие тела” тIвар алай ктаб шииррин пуд кIватIалдикай ибарат я. Испаниядин литературадал рикI алайбуру и ктабдиз еке итиж авуна, лезги шаирдин шииратдиз машгьур писатель, критик Анжело Эстебана, Кубадин шаир Амаури Гутьерреса хъсан къимет гана.
Алай йисуз адахъ «Женнетдин къушар» тIвар алаз шииррин цIийи кIватIал ва маса ктабар чапдай акъуддай фикир ава. Абурулай гъейри, къелемдин устад алай вахтунда 20-асирдин эхиррин ва 21-асирдин сифте кьилерин вакъиайрикай документрал бинелу роман кхьинал машгъул я. Чазни ватанэгьлидихъ мадни еке агалкьунар хьун, мурадар кьилиз акъатун кIанзава.
Куругъли Ферзалиев
