7-майдиз Сулейман-Стальский райондин КIахцугърин хуьре Ватандин ЧIехи дяведа иштиракай и хуьруьнвияр эбеди рикIел хуьнин гуьмбет ачухунин мярекат кьиле фена. Идакай «Лезги газетдиз» райадминистрациядин пресс-къуллугъди хабар гузва.
Чешмеди къейдзавайвал, эцигунрин кIвалахар хуьруьнвийри хушуналди чара авур такьатрихъ тамамарна. Иллаки Ражаб Мегьамедова, Махач Шихжалилова, Пирмегьамед Исмаилова, Мегьамед Халидова ва масабуру куьмек гана. Гуьмбет туькIуьрай устад-скульптор Замир Буржумов я.
Гуьмбет ачухунин мярекатда райондин кьил Нариман Абдулмуталибова, адан сад лагьай заместитель Лацис Оружева ва хейлин масабуру иштиракна. Райондин кьили кIватI хьанвайбуруз Гъалибвилин суварин вилик хуьре кьиле фейи важиблу вакъиа тебрикна, ихьтин метлеблу кардик къуьн кутур вири кIахцугъвийриз чухсагъул малумарна.
Гуьгъуьнлай тебрикдин гафар маса мугьманрини лагьана. КIахцугърин юкьван мектебда кIелзавай аялрини иштиракна. Мярекат гуьмбетдал цуьквер эцигуналди ва цавуз лифер ахъаюналди куьтягь хьана.
«Лезги газет»
