Гьар са халкьдихъ общество патал баркаллу крар авур ва ийизвай рухваярни рушар ава. Гьа ихьтинбурукай сад Яракьлу Къуватрин полковник  Абдулаким  Абдулаевич  Гьажимурадов  я.

Ватандин сир алцум жедач

Камарални чипIерал,

Ам алцумиз жеда анжах

Адахъ кузвай рикIерал, — кхьенва чи бажарагълу шаир Майрудин Бабаханова вичин са шиирда. Завай инанмишвилелди лугьуз жеда хьи, михьи рикI авай, сабурлу къилихдин, дамах гвачир итим хьиз, Абдулаким Абдулаевич Ватандихъ рикI кузвай кьегьал хвани я.

…Абдулаким 1946-йисан 8-августдиз Агъа Арагърин хуьре муаллимдин хизанда дидедиз хьана. Ада хуьре 4-класс куьтягьна. Вад аял авай  Гьажимурадоврин хизан Кьасумхуьрел куьч хьана. Абдулакима 1964-йисуз гьана юкьван школа акьалтIарна.

— А йисар регьятбур тушир, — рикIел­ хкизва А.Гьажимурадова. — Чи хизанни агьваллу я лугьуз жедачир. Зи чIехи кьве ваха Махачкъалада кIелзавай, кIвале залай гъвечIи кьве стхани авай. Гьи­кьван четин тиртIани, зун ПВО-дин кьушунрин Вильнюс шегьерда авай училищедик экечIна. 1967-йисуз анаг “радиотехник” пешекарвал къачуналди акьалтIарна. Лейтенант яз хуьруьз хтай за хизандиз жува кIватIай пулунихъ газдин пич, холодильник, телевизор къачунай…

Жегьил офицерди вичин къуллугъдин рехъ 1967-йисуз цIийиз арадал атанвай Гьавадинни Космический кьушунра электромеханикадин отделда сменадин начальник яз башламишна. И везифаяр ада 1970-йисалди кьиле тухвана. Гуь­гъуьнлай Абдулаким Абдулаевича Куйбышеван тIварунихъ галай Военно-инженерный академиядин электромеханический ва регьбервал гудай инженервилин факультетар  акьалтIарна.

Са кьадар йисара ада промышленностдин карханайра военный векил яз, 1983-1988-йисара Москвада УНР-дин кьилин механиквиле кIвалахна.

— Промышленностдин карханайра военный векилвал авун жавабдар кIвалах тир, — лугьузва А.Гьажимурадова. — ГьикI лагьайтIа, зи хиве армиядиз рекье твазвай тадаракрин еридал гуьзчивал авун, конструкторри гьазурзавай чертёжар ахтармишун, рехнеяр квай тадаракар элкъуьр хъувун, заводрин кьилерихъ, конструкторрихъ галаз сих алакъа­да аваз кIва­лахун ва ихьтин маса везифаяр авай. И крарал зи рикI алай, гьавиляй армиядин чIехи командиррин патай туьнбуьгьни хьанач, абуру зи кIвалахдилай разивал къалурна.

1988-1993-йисара Абдулаким Абдулаевича сиф­тедай Дагъустан Республикада, гуьгъуьнлай Удмуртияда, МЧС-дин гражданский оборонадин штабда ИТО-дин (инженерно-технический отдел) начальниквиле кIвалахна, ахпа ам отставкадиз фена.

“Вуж къекъведа, такабурлу кьил кьуна, Ам ре­кье­лай алудиз жеч, гъил кьуна”, — кхьенай Низами Генжевиди.

Уьмуьр Ватандиз бахш авур А.Гьажимурадовани халкьдиз, обществодиз къуллугъ авун давамарзава. Полковник кьиле авай райондин дяведин, зегьметдин, Яракьлу Къуватрин, къайдаяр хуьдай органрин ветеранрин советди райондин кьил Нариман Абдулмуталибовахъ, общественный тешкилатрихъ, УСЗН-дихъ, КЦСОН-дихъ ва маса къу­ру­лушрихъ галаз сих алакъада аваз кIва­­­­лахзава. Советда “Полковникрин клуб­ни” кардик ква. Адан членри лишанлу вакъиайриз талукьарна тухузвай мярекатра, школадилай къеце тухузвай се­ренжемра, ачух тарсара, общественный акцийра иштиракзава.

Абдулаким Абдулаевича, “Пол­ковникрин клубдин” член Магьсуд Магьмудова  ЦIийи  Макьарин  юкьван  шко­лада лап хъсандиз кIелзавай аялриз чпин патай пулдин премияр гуз са шумуд йис я.

Советди школайра “Юнармия” отрядар тешкилун, “Зарница” къугъунар тухун патални еке кIвалах тухузва.

Райондин ветеранрин совет Дагъустан Республикада хъсанбурукай сад я. ИкI, 2017-йисан нетижайрай кьвед лагьай­ чка кьур адаз вете¬ранрин Дагсоветди пулдин премия гана.

Ватанпересвилин, тербиячивилин, насигьатчивилин кIвалахдай совет  РФ-дин дяведин, зегьметдин, Яракьлу Къу­ватрин, къайдаяр хуьдай органрин ветеранрин Союздин председатель Моисееван къул алай Гьуьрметдин грамотадиз ва махсус знакдиз лайихлу хьана.­

Запасда авай полковник А.Гьажимурадоваз яргъал йисара Яракьлу Къуватрин жергейра намуслудаказ къуллугь авунай, Ватандин вилик лайихлувилерай са шумуд орден, медалар ганва.

Ватан, общество, халкь патал менфятлу са вуч ятIани алакьун, агьалийрин патай гьуьрмет къазанмишун гьар са инсан патал виридалайни чIехи наг­рада я, — лугьузва Абдулаким Абдулаевича.

А.Гьажимурадов кье­тIен xaтI авай мухбирни я. Ада районда кьиле тухузвай мярекатрикай, ветеранрин советдин кIвалахдикай РФ-дин “Ветеран”, “Учитель Дагестана”, “Куьредин хабарар” газетриз итижлу ма­къалаярни кхьизва. Къени инсан, запасда авай полковник, хъсан общественник Абдулаким Гьажимурадовакай макъала заз шаир Рамазан Каитован шиирдин цIараралди куьтягьиз кIанзава:

Инсанвилин муг авур кас къилихда,

Уьмуьрда чка жедач адаз синихда.

Хазран Кьасумов