Алатай жуьмя юкъуз Махачкъала шегьердин Ленинский райондин администрацияда  Даунан синдром азардикди начагъ аялдиз-Къизханум Селимхановадиз — 100 квадратный метрдин майдан авай квартира мергьяматлувилин къанунралди багъишуниз талукьарнавай шад мярекат кьиле фена.

Ана  РД-дин Кьилин патай тамам ихтиярар ганвай Алибег Алиева, Ленинский райондин кьил Мегьамед Алхасова, Къ.Селимхановадин диде  Анфисади, и хизандиз кIвал гайи кас — “Раян” ЖСК-дин гендиректор-Закирхан Гьажиева, журналистри иштиракна.

Мярекатдал рахай А.Алиеван, М.Алхасован суьгьбетрай малум хьайивал, Селимхановрин хизанда алай вахтунда 16 йис тамам хьанвай Къизханум Даунан синдром аваз дидедиз хьана. Вад касдикай ибарат тир абурун хизан Олег Кошевоян куьчеда, хизандин общежитида 18 квадратный метрдикай ибарат тир кIвале яшамиш жезва. Алай йисан июндин вацран эхирра кIва­лин рак мад са бедбахтвили гатана. Диде кухняда хуьрек гьазурунал машгъул хьанвайла, Къизханумаз, пенжердиз акьахна, анай куьчедиз килигиз кIан хьана. 4-мертебадин пенжердай аватай рушан кьулан тарциз еке хасаратвилер хьана, ам тамам са вацра Махачкъалада азарханада хьана. И мукьвара адаз Саратов шегьерда опера­ция авуна. Зур йисан вахтунда адаз духтурри ацукьдай ихтияр гузвач, ам руфунал къаткуниз мажбур я.

Ихьтин бедбахтвални хъхьай хизандин ийир-тийир, гьал мадни четинди хьана. Талукь идарайриз кхьей чарар-цIарарихъни нетижа хьанач. А.Селимханова михьиз руьгьдай аватна. Ада РД-дин Кьилиз чар кхьин кьетIна. Рамазан Абдулатипова хизандин дуланажагъдин шартIар ахтармишунин месэла Алибег Алиевал тапшурмишна. Яргъал тевгьена, ам кьиле аваз делегация Селимхановрин кIвализ мугьман хьана.

— Авайвал лагьайтIа, заз алай вахтунда инсанар икьван агъур шартIара яшамиш жезвайди чизвачир,- ихьтин гафарилай башламишна ада вичин рахунар. -КIвал 4-мертебада, санузел 1-мертебада, кухняни дегьлиздин агъа кьиле ава. Хизанда кIвалахзавайди анжах са буба я, пул бес жезвач. Авай гьалдикай за гьасятда Ленинский райондин кьил М.Алхасоваз ва Дагъустандин Кьил Р.Абдулатиповаз хабар гана. Мегьамед Алхасова месэла вичин гуьзчивилик кутуна,-суьгьбетна А.Алиева.

— Гьайиф хьи, къенин юкъуз чахъ-райондин администрациядихъ-кIеве авай ксариз я чилер, я кIвалер чара ийидай фонд авач. Мукьвал вахтара чун Ленинский райондин администрациядин патав ихьтин фонд арадал хкунал машгъул жеда, — алава хъувуна М. Алхасова. — ИкI, чун кIеве авай касдиз куьмек гудай кас жагъуруниз мажбур хьана. Чна адаз рикIин сидкьидай чухсагъул лугьузва.

Нубатдин гаф рахай Закирхан Гьажиева Алибег Алиеваз ва Ме­гьа­мед Алхасоваз, дугъриданни, дуланажагъдин шартIар четинбур тир хизан жагъуриз куьмек гунай сагърай лагьана.

— Гзаф мертебайрин кIвал эцигунив эгечIдайла, зи рикIе, ам эцигна куьтягьайла, кIеве авай са хизан­диз  68 квадратный метрдикай ибарат тир квартира, садакьа яз, гу­нин ният авай. Къе, мусурманар патал пакди тир жуьмя юкъуз, заз ихьтин мумкинвал хьанва. И хизандин гьал фикирда кьуналди, за абуруз 100 квадратный метрдин  майдан авай квартира гун кьетIнава. КIвал Турали посёлокда 2-мертебада ава, -алава хъувуна З.Гьажиева.

Шад мярекатдал Мегьамед Ал­хасова, мумкинвилер жагъурна, а кIвале ремонтдин кIвалахар авун администрациядин хивез къачунвайдакайни хабар гана. Идалайни гъейри, райондин кьиле авай ксари (цIийи кIвал ишлемишиз вахкудалди са шумуд варз амайди фикирда кьуна) хизан патал къулай шартIар авай квартира кирида кьунва.

Анфиса Селимхановадихъ галаз кьиле фейи суьгьбетдай малум хьайивал, адан ери-бине Мегьарамдхуьруьн райондин ЦIийи Филяй, умуьрдин юлдашни Хив райондин АрхитIай я. Хизанда, Къизха­нумалай гъейри, кьве хва чIехи жез­ва. Дуланажагъдин четин шар­тIа­рикай дишегьлиди шегьердин Лени­нский райондин администрациядиз сифте 2010-йисуз хабар ганай,  амма учир сакIани мукьва жезвачир. КIвал маса къачудай мумкинвал вичихъ садрани тежедайди ада кьатIанвай: жуьреба-жуьре кIвала­хар тамамариз, уьмуьрдин юлдашди къазанмишзавай пул дарманризни рапариз физвай, бегьемвилелди тIуьнизни бес жезвачир.

Мярекатдин эхирдай Анфиса Селимхановади вичин хизандиз хъсанвал авур, чпин дердиникай хабар кьур вири ксариз чухсагъул малумарна. КIватI хьанвайбур ви­ри квартирадиз тамашиз фена.

Рагнеда Рамалданова