Малум тирвал, Афгъанистанда советрин аскерри а уьлкведин азадвал ва аслу туширвал хуьн патал чпин интернациональный буржи тамамаруникай гзаф кьадар кинофильмаяр яратмишнава.
Амма и барадай, душманрихъ галаз хьайи женгерикай гьеле чаз таниш туширбурни амачиз туш. “Братство” (“Стхавал”) тIвар алаз бажарагълу режиссёр ва сценарист, Россиядин халкьдин артист Павел Лунгина гьазурзавай цIийи фильм гьа ихьтин, яни чаз гьеле малум тушир женгерикай садаз талукь я.
ЦIийи фильмдин кьилин сюжетда советрин кьушунрин 108-мотострелковый дивизия Афгъанистандин Чарикар лугьудай чкадай Саланг гирведал перевалдиз ахкъуддайла кьиле фейи барабарсуз женгина чи аскерри къалурай кьегьалвилерикай суьгьбетзава.
Фильм яратмишзавай дестедин директор Евгений Виноградова лугьузвайвал, алай вахтунда Афгъанистанда гьалар хъсанзавачирвилиз килигна, цIийи кинолента Таджикистанда, Къиргъизистанда ва Дагъустанда, кьилди къачуртIа, Дербентда, гьазурун къарардиз къачунва. Къадим шегьерда фильмдин талукь тир пай гьазурунив гьа и зулуз эгечIдайвал я.
“Братство” тIвар алай цIийи кинолента къадим шегьердани гьазурунихъ еке метлеб авайди фикирда кьуна, и мукьвара адан яратмишунрин десте Дербентдин кьил Малик Баглиева кьабулна ва ада фильм туькIуьрун патал вири шартIар яратмишун хиве кьунва.
Лезги Газет
