Ахцегь райондин кар алай хилерикай сад туризм я. Къудратлу дагълар, гуьрчег чуьллер, тарарни тамар, ван алай вацIарни кIамар, чарчарарни вирер, менфятлу ятар ргазвай чешмеяр, тарихдин, архитектурадин имаратар… — вири ибур Ахцегь районда ава. Гьакъикъатдани, райондин мулкар кьетIен, надир чкайралди девлетлу я. Райондин агьалиярни мугьманпересбур я.

«Лезги газетдиз» Ахцегь райондин администрациядин пресс-къуллугъди хабар гузвайвал, мукьвара Ахцегьиз Москвадайни Санкт-Петербургдай туристар – Александр ва Татьяна – мугьман хьана. Яргъай атай мугьманар райондин культурадин, спортдин, жегьилрин сиясатдин ва туризмдин управлениди хушвилелди кьабулна. Туристриз УКСМПиТ-дин начальникдин заместителди дагълух райондин виридалайни итижлу чкаяр къалурна, райондин кьетIенвилерикай ихтилатна. Мугьманри дагъвийрин мугьманпересвилел, тIебиатдин иервилел гьейранвална.

«Лезги газет»