Гъалибвилин йикъаз талукьарна, и йикъара Кьасумхуьрел жаван гадайрин арада волейболдай кIвенкIвечивал патал акъажунар кьиле фена. Идакай «Лезги газетдиз» Сулейман-Стальский райондин администрациядин пресс-къуллугъди хабар гана.
Волейбол жаванрин арада машгьур авунин, и рекьяй абурун устадвал хкажунин, республикадин акъажунра иштиракдай хкягъай десте тайинарунин макьсадралди кьиле тухвай мярекатда райондин са шумуд командади иштиракна.
Нетижада Кьулан СтIалрин Р.Халикьован тIварунихъ галай мектебдин команда гъалиб хьана. Кьвед ва пуд лагьай чкаяр Курхуьруьн М.Рагьимован тIварунихъ галай 1-нумрадин мектебдин ва Агъа СтIалрин мектебдин командайри кьуна.
Тафаватлу хьайи командайриз кубокар ва дипломар гана. Къейд ийин, волейболдин акъажунар райондин спортдин, туризмдин ва жегьилрин крарин комитетдини райондин образованидин управлениди тешкилна.
«Лезги газет»
