29-апрелдиз Дагъустандин Кьил Владимир Васильев “КамАЗ-мастер”-дин экипаждихъ галаз гуьруьшмиш хьана.
Дагъустандин чилел атанвай мугьманар хушвилелди тебрик авур Владимир Васильева “КамАЗ-мастер”-дин экипаж республикадиз атун лишанлу вакъиа тирди къейдна.
Гуьруьшда иштирак авур РД-дин физкультурадин ва спортдин рекьяй министр Мегьамед Мегьамедова малумарайвал, тешкиллувилин жигьетдай лап вини дережада аваз тухвай чIехи серенжемди — автогонкайрай экипажди къалурай мастер-классди — регионда спортдин и жуьре гележегдани машгьур авуниз къуллугъда.
Санал кIвалахунихъ умудлувал къалуруналди, РД-дин Гьукуматдин Председатель Артем Здунова Дагъустандихъ са тIимил гьазурвилер акурдалай гуьгъуьниз автогонкаяр тешкиллудаказ кьиле тухудай тIебии лап вижевай шартIар авайди къейдна.
Вичин нубатдай яз “КамАЗ-мастер”-дин экипаждин пилот Айрат Мардеева чеб Дагъустандиз сифте яз атанвайдан, адан тIебиатдин гуьзел шартIари чеб гьейранарнавайдан гьакъиндай малумарна: “Дагъустандин накьварал атайвалди, чаз гьар са 20-30 километрдин мензил атIайдалай гуьгъуьниз чилин къурулуш дибдай дегиш жезвайди акуна. Ина гьакъикъатдани итижлу ва жуьреба-жуьре дережайрин автогонкаяр тешикилиз жеда. Иниз инсанар къведа”, — инанмишвал къалурна капитанди. Ада “КамАЗ- мастер”-дин команда жегьил несил вердишарунин месэладални кIевелай машгъул жезвайдан гьакъиндай малумарна.
“Чиди спортдин республика я. Акъажунар кьиле тухунин руьгь дагъустанвийрин ивидик квайди я”, — къейдна Дагъустандин Кьили. Ада Гьукуматдин Председателдин Сад лагьай заместитель Анатолий Къарибовал, туризмдин ва халкьдин художественный сеняткарвилерин рекьяй министр Расул Ибрагьимовал республикада автомаршрутар тешкилунин планар кьилиз акъудунин кIвалахдик активдаказ экечIун тапшурмишна.
Къейд ийин, “КамАЗ-мастер”-дин команда спортда лап машгьурвал къазанмишнавайди я. Набережные Челны шегьердай тир автогонщикри, чи “КамАЗ” машинра аваз акъажунра иштирак авуналди, дуьньядин автомобилрин промышленностдин кIвенкIве жергейра авай “Мерседес”, “МАН”, “Рено”, “ДАФ”, “Жинаф”, “Хино”, “Татра”, “Ивеко” маркайрин автомобилра аваз майдандиз экъечIзавай спортсменрихъ галаз кьиле физвай баришугъ тежер женгера хейлин наградаяр къазанмишна. “КамАЗ-мастер”-дин экипажар 16 сеферда “Ралли Дакар” акъажунра гъалиб хьана.
Мугьманрихъ галаз кьиле тухвай гуьруьшда РД-дин Гьукуматдин Председателдин Сад лагьай заместитель Анатолий Къарибова, туризмдин ва халкьдин художественный сеняткарвилерин рекьяй министр Расул Ибрагьимова иштиракна.
Чи мухбир
