27-апрелдиз РД-дин здравоохраненидин министр Жамалудин Гьажиибрагьимова Сулейман-Стальский районда агьалияр кьабулна. Абурук къалабулух кутазвай са жерге суалриз жавабар гайи гуьруьш райадминистрациядин дараматда кьиле фена. Ана Сулейман-Стальский райондин кьил Нариман Абдулмуталибова, РД-дин здравоохраненидин министрдин заместитель Салман Агьмедова, райадминистрациядин кьилин сад лагьай заместитель Лацис Оружева, райондин общественный палатадин председатель Алимет Мейланова, Сулейман-Стальский ЦРБ-дин кьилин духтурдин заместитель Мумина Абдулаевади ва СМИ-рин векилри иштиракна.
Жамалудин Гьажиибрагьимова и юкъуз 12 агьали кьабулна. ИкI, КIварчагърин хуьряй тир Зейнулагь Наврузова са шумуд месэладин, гьа гьисабдай яз хуьре амбулаториядин дарамат эцигунин, КIварчагъ дередин агьалийрив “Тади куьмек” вахтунда агакьунин, вичин хцин свас, Экендал медсестра яз кIвалахзавай Наталья Наврузова КIварчагърин хуьруьн ФАП-диз хкунин патахъай куьмек гун тIалабна. Министрди и месэлайрал гуьзчивал авун хиве кьуна, гьакIни Сулейман-Стальский ЦРБ-дин кьилин духтурдин заместителдал Наталья Наврузовадиз кьве хуьре-Экендални КIварчагъа кIвалахдай мумкинвилиз килигун тапшурмишна.
Кьасумхуьрелай тир Элита Османовади 2001-йисуз ханвай, церебральный параличдин ва эпилепсиядин какахьай приступри азаб гузвай вичин хциз инвалидвал тайинарунин патахъай куьмек гун тIалабна. И месэладиз талукь яз министрди Дагъустан Республикадин МСЭ-дин Кьилин бюродин регьбер Шамил Рамазановаз телефондай зенгна. ГьакIни Сулейман-Стальский ЦРБ-дин векилдиз лазим документар туькIуьрунин тапшуругъ гана.
Бутхуьруьнви Эрзиман Жарулаева ва ЦIийи Макьарилай тир Агьмад Магьмудова чеб кьезилвилер аваз дарманралди таъмин тавунин жигьетдай шикаятна. Райондин кьил Нариман Абдулмуталибова министрдиз районэгьлияр вичин патавни и месэладин патахъай гзаф къвезвайдакай лагьана. Жамалудин Гьажиибрагьимова и месэла вичин гуьзчивилик жедайдахъ инанмишарна.
Махсус центрайра чпин багърияр сагъарун ва реабилитациядин курс кьиле тухун патал квотайриз талукь месэладин патахъай министрдивай куьмек тIалабиз Испикай — Рита Гьабибулаева, Агъа СтIалдилай — Жабраил Асланов, Кьасумхуьрелай Мегьамед Алиев атанвай. Ж.Гьажиибрагьимова абуруз месэладиз килигун, куьмек гун хиве кьуна.
Райондин общественный палатадин председатель Алимет Мейланова министрдивай “Тади куьмекди” менфятлудаказ кIвалахун патал лазим шартIар тешкилунин, Герейханован хуьруьн участковый больницада капитальнидаказ ремонт кьиле тухунин, поликлиникада стоматологиядин кабинет алай аямдин тадаракралди таъминарунин ва ЦРБ-да чиркин ятар михьдай имаратар ремонт авунин месэлайрай куьмек гун тIалабна. Жамалудин Гьажиибрагьимова Алимет Мейланован арза вичин гуьзчивилик кутун хиве кьуна. Кьилди къачуртIа, Герейханован хуьруьн участковый больница РД-дин здравоохраненидин министерстводин балансдал вахкайла, ам капитальнидаказ ремонт авунин месэладизни килигда. Муькуь кьве месэладайни лазим серенжемар кьабулда.
Агьалияр кьабулуниз талукь гуьруьшдал Нариман Абдулмуталибова райондин медицинадин идарадин къуллугъчийри мажиб вахтунда къачун тавуниз талукь месэлани къарагъарна. Министрди и месэладай кьил акъуддайдахъ инанмишарна. Амай вири месэлайрин патахъайни Ж.Гьажиибрагьимова агьалияр гъавурда туна, лазим тапшуругъар гана.
Чи мухбир
