Ахцегь райондин кьил Осман Абдулкеримован тапшуругъдалди, райондин умуми образованидин мектебрин чIехи классра экстремизмдинни терроризмдин идеологиядиз аксивал къалуруниз талукь мярекатар кьиле тухун давамарзава.
Алай девирда жегьилрин арада ихьтин серенжемар кьиле тухунихъ еке метлеб ава. ИкI, профилактикадин нубатдин серенжем Ахцегь райондин 1-нумрадин мектебдин чIехи классра кIелзавай аялрихъ галаз райондин АТК-дин къуллугъчияр тир Ш.Арухован, И.Мегьамедован, Ахцегьрин мискIиндин имам, райондин имамрин советдин председатель А.Абдулгьашумован, РД-дин Муфтиятдин Ахцегь районда авай марифатдин отделдин векил Х.Ашуралиеван ва жегьилрин арада азаддиз кьуршахар кьунай Россиядин чемпионатда приздин сагьиб хьайи Артур Эфендиеван иштираквал аваз кьиле фена.
Акьалтзавай несилди экстремизмдинни терроризмдин идеологиядиз аксивал къалурунин, законсуз, чIуру, инсанрин уьмуьр патал хаталувал авай гьерекатар негь авунин муараддади тешкилай суьгьбетдин вахтунда, мярекатдин мугьманри аялар гзаф месэлайрин гьакъиндай гъавурдик куна, шаклу дуьшуьшра абуру чеб тухудай къайдаяр чирна, жегьилрик ватанпересвилин гьиссерни кутуна.
«Лезги газет»
