24-26-апрелдиз Кьурагь райондин медениятдин дараматда, Ватандин ЧIехи дяведин Гъалибвилин 74 йисаз талукьарнавай мярекатрин сергьятра аваз, райондин мектебра кIелзавайбуру сегьнедилай ватанпересвилин манияр тамамарунин конкурс-фестиваль кьиле фена.
«Лезги газетдиз» райондин администрациядин пресс-къуллугъди хабар гайивал, кьиле тухвай мярекатдин макьсад мектебра кIелзавайбуруз ватанпересвилин ва ругьдинни ахлакьдин тербия гун тир. Пуд йикъан къене давам хьайи конкурс-фестивалда райондин цIукьуд мектебдин коллективди дяведин йисариз, Гъалибвилиз, Ватандиз, Россиядин армиядиз талукь ватанпересвилин манияр тамамарунин карда чпин устадвални алакьунар къалурна.
Махсус заседанидал нетижаяр кьурдалай кьулухъ, гъалиб хьайибурузни хъсан чкаяр кьурбуруз димломарни грамотаяр гудайвал я. Агалкьунар къейдунин шад вакъиа, 9-Майдин Гъалибвилин суварин гурлу мярекатдин сергьятра аваз, кьиле фида.
«Лезги газет»
