Гатфар къвердавай вичин ихтиярда гьатзава. Им лагьайтIа, тIебиатдал чан атунихъ галаз сад хьиз, чуьлдин кIвалахарни артух хьанвайдакай, абур галай-галайвал тамамарун лазим тирдакай хабар гузвай лишан я. Багъларани уьзуьмлухра абурув фад гатIуннавайтIани, магьсулар цанвай никIера исятда кIвалахар тIимил авач. Абур геж хьайитIа, техилрин бегьерни агъузди жеда эхир. И кардин гъавурда Курхуьрел кардик квай лежбервилин майишатрин магьсулдарар хъсандиз ава. Абуру, сифте нубатда, къацар са артух хкаж жедалди кьиферихъ галаз женг тухузва — абурун тIеквенрик дарманар кутуна куьтягьзава.
Яван хьанвай никIериз миянардай шейэрни вахтунда вегьинихъ еке метлеб авайди фикирда кьуналди, никIер миянарзава. Ида, са шакни алачиз, гьар са гектардай техилдин бегьер артухарда. ГьакI хьайила, лежбервилин майишатрин сагьибар тир Саругъланов Нарима, Шайдаев Сефербега, Сийибулаев Тарлана, Саругъланов Вилимета ва масабуруни чпин къайгъуяр ийизва. Санлай къачурла абурун хиве 187 гектардин къацар миянарунин везифа ава. Мукьвара абур важиблу и кардив эгечIда. Гьа са вахтунда кьвед лагьай сеферда кьифериз дарманарни кутада, гьикI хьи, вири участокра кьифер кьери хьанвач. Къацар авай никIерал гуьзчивални артухарнава. Исятда чуьллериз гзаф кьадар мал-къара, лапагар акъуднава. Кьилел кас алачирвиляй абуру никIериз-къацариз зиянар гун мумкин я. ГьакI хьайила, никIериз иесияр чеб килигуниз мажбур жезва.
Райсудин Набиев
