Россиядин Хатасузвилин Советдин секретарь Николай Патрушева Махачкъалада  Кеферпатан Кавказдин федеральный округдиз талукь месэлайрай совещание тухвана­. Ам СКФО-да РФ-дин Президентдин па­тай­ тамам ихтиярар ганвай Векил Александр Матовниковахъ, федеральный округдик акатзавай регионрин кьилерихъ ва федеральный министерствойрин, ведомствойрин векилрихъ галаз санал Россиядин Президентдин тапшуругъдалди кудай шейэринни энергетикадин комплексдин хиле хатасузвилиз къурху гунин гьалар арадай акъудунин серенжемриз килигна.

Н.Патрушева алатай йисуз террориствилин гьерекатар Мукьвал тир РагъэкъечIдай патан региондай Кеферпатан Кавказдин федеральный округдин мулкарал хкунин къурхулувилер арадай акъудунин рекьяй, терроризмдинни экстремизмдин вилик пад кьунин, абурун аксина женг чIугунин рекьяй ийизвай чалишмишвилер артухарун чарасуз тирди кьетIендаказ къейд авурди рикIел хкана.

Россиядин Совбездин секретардин гафаралди, къанун-къайда хуьдай органри, махсус къуллугъри регионрин государстводин властдин органрин иштираквал аваз гьа ихьтин кIвалах тухвана. Кьабулай серенжемрин нетижада террориствилин ва экстремиствилин кIвалахдихъ галаз алакъа авай 452 кас кьуна. СКФО-дин мулкунал махсус серенжемар кьиле тухудай чIавуз 64 боевик хатасуз авуна, бандитвилин тешкилатрин иштиракчияр тир 285 кас кьуна ва суддин вилик акъвазарна. Террориствилин 37 къурулушдин кIва­лахдин вилик пад атIана. Радикальный исламдин зиянкарвилин кIвалахдал маш­гъул жезвай идеологар дуьздал акъудна, абурукай 44 кас уголовный жавабдарвилиз чIугуна.

Тухвай кIвалахдин нетижада экстремиствилин жуьредин тахсиркарвилерин кьадар тIимил хьана.

“Идахъ галаз сад хьиз, чпиз пучвилер хьан­ватIани, дуьньядин террориствилин тешкилатрин эмиссарри  инсанар чпин терефдал желб авунин кIвалах тухунин цIийи ала­хъунар ийизва. Сифте нубатда абуру жегьил­рин кьил-кьилелай алудун патал еке чалишмишвилер ийизва”, — малумарна Н.Патрушева.­

Ихьтин шартIара ада гьалар къизгъин хьуниз рехъ тагунин мураддалди жуьреба-жуьре къурулушри саналди тир кIвалах давамарунин важиблувал къейдна.

Совещанидал жегьилриз ватанпересвилин, ахлакьдинни марифатдин тербия гудай  къурулуш арадал гъунин кIвалах мадни хъсанарунихъ элкъуьрнавай къарарар кьилиз акъудуникайни ихтилат кватна.

Николай Патрушева жегьилрин тешкилатриз къуват гунин рекьяй алава серенжемар кьабулунал кьетIендаказ фикир желбна­.

Россиядин школьникрин, кадетрин ва гел жагъурдайбурун, “Гъалибвилин волонтерар” тIвар ганвай  Вирирос­сиядин, аялринни жаванрин военный ва ватанпересвилин “Юнар­мия” гьерекатар къвердавай гужлу жезва.­

“Социальный сетра информациядинни пропагандиствилин кIвалах гужлу авун давамарун, агьалияр жавабдарвал вини дережада аннамишунин руьгьдаллаз тербияламишун, алай аямдин ватандашри зегьметда къазанмишзавай агалкьунар машгьур авун, Рос­сия­да яшамиш жезвай халкьарин культурадиз, адетриз ва тарихдиз гьуьрметунин ерияр  ку­тун важиблу я”, — инанмишвал къалурна уьлкведин Хатасузвилин Советдин секретарди.­

Совещание кьиле фидай чIавуз кудай шейэринни энергетикадин комплексда технологический тадаракар лап куьгьне хьанвайвилихъ, промышленностдин хатасузвилин патахъай ийизвай истемишунрал амал тавунихъ, сетра электроэнергия ва газ нормативра къалурнавайдалай гзаф пуч хьунихъ, Кеферпатан Кавказдин регионра энергетикадин хиле тахсиркарвилерин дережа винизди хьунихъ, агьалийри ва ЖКХ-дин ор­га­низацийри ишлемишзавай энергоресурсрин гьакъи гунин барадай бурж артух хьунихъ галаз алакъалу месэлайризни фикир гана.

Энергетикадин хатасузвилин дережа хкажун, уьлкведин къенепата энергиядин чешмейрин патахъай авай игьтияжар дуьзгуьнда­каз таъминарун, энергосистемайри пайгар­да­каз ва хатасуздаказ кIвалах авун экономи­ка­дин рекьяй Россиядин милли хатасузвал таъ­минарунин рекьерикай сад тирди къейдна.­

Совещанидал республикада общественно-политический гьалар къайдадикай хкудунин барадай тухузвай тахсиркарвилин кIва­лахдин рехъ атIуниз талукь серенжемар веревирдна.

“Терроризмдиз акси комиссийри кIвалах алакъалу ийидай роль къугъунин шартIара терроризмдин идеология чукIурунин рехъ кIевелай атIун патал, профилактикадин кьетIи серенжемар  кьабулун герек я. Гьа са вахтунда­ тербиядин кIвалах активламишун ва ам чпин миллетдилай ва чпи инанмишвалзавай динди­лай аслу тушиз вири агьалийриз гьуьрмет аву­нин руьгьдаллаз тухун герек я”, — малумарна РФ-дин Хатасузвилин Советдин секретарди.

Совещанидал рахай СКФО-да государстводин кьилин патай тамам ихтиярар ганвай­ Векил Александр Матовникова кудай шейэринни энергетикадин комплексдин хиле хата­сузвал таъминарун регионрин, федеральный министерствойрин, къанун-къайда хуьдай органрин, энергетикадин компанийрин руководителрин саналди тир кIвалахдин кар алай тереф тирди къейдна.

Гьа и юкъуз СКФО-да РФ-дин Президентдин патай тамам ихтиярар ганвай Векил Александр Матовниковахъ ва Дагъустан Республикадин Кьил Владимир Васильевахъ галаз гуьруьшмиш хьайи чIавуз РФ-дин Хатасузви­лин Советдин секретарди регионда милли хатасузвал таъминаруниз талукь лап важиблу са жерге маса месэлаярни веревирдна.

Чи мухбир