Азадун мумкин я
Гьукуматди гъвечIи мажибрал алай россиявияр менфятдилай къачузвай налогрикай азадунин месэла веревирд авун мумкин я. “Известия” чешмеди хабар гузвайвал, и месэла яшайишдинни зегьметдин алакъаяр къайдадик кутуниз талукь Россиядин пуд терефдин комиссиядин (РТК) аппаратда веревирдна.
Ихтилат НДФЛ кьурдалай кьулухъ яшамиш хьуниз лазим агъа кIанин кьадардилай тIимил менфят ацалтзавай ватандашрикай физва. Уьлкведа и мажибар юкьван гьисабдалди 13 агъзур манатдилай тIимил я.
Зегьметдин кодексдал асаслу яз, кIвалахдалди таъминарзавайдавай къуллугъчидиз зегьметдин гьакъидин агъа кIанин кьадардилай тIимил гуз жедач. Росстатдин делилралди, 2017-йисуз (2018-йисан делилар гьелелиг малум туш) чпин къазанжидин кьадар 13800 манатдилай артух тушир ксарин кьадар уьлкведа 15,2 процентдив (тахминан 11 миллион инсан) агакьнавай.
Аслу тушир профсоюзрин федерациядин секретарь О.Соколован гафаралди, налогриз талукь месэла кардик кутунин гьакъиндай гьелелиг меслятар авунвач. Амма чешмеди хабарар кьур пешекарри и серенжем адалатлуди яз гьисабзава.
Россиядивай къачуда
Кеферпатан Кореядиз Россиядивай цIийи самолетар къачудай фикир ава. Идакай, ТАСС-ди хабар гузвайвал, Госдумадин вице-спикер, Пхеньянда авай Россиядин парламентарийрин дестедин кьиле акъвазнавай Сергей Неверова къейдна.
Ада рикIел хкана хьи, алай вахтунда Кеферпатан Кореядин авиалинияди Пхеньяндин ва Владивостокдин арада рейсер кьилиз акъудзава. Гьавиляй Россиядинни Кореядин терефриз, Россияда арадал гъанвай алай аямдин самолетар и маршрутдиз акъудуналди, цавай финин хатасузвал артухардай фикир ава.
Неверован фикирдалди, ихьтин икьрардикди неинки россиявийрин, гьакI Пхеньяндиз кьван самолетра аваз фидай маса уьлквейрин ватандашрин итижарни фикирда кьур мисал жеда.
Air Koryo авиакомпания, адет яз, Россиядин самолетрикай ибарат я. ИкI, алай вахтунда уьлкведин къене пассажирар санай масаниз тухун патал Ил-18 ва Ту-154 самолетрикай менфят къачузва. Международный рейсер лагьайтIа, Ту-204 самолетди кьилиз акъудзава.
Камаллу теклиф
Мумкин тир ядерный дяведин вилик пад вахтунда кьун патал США-ди Россиядихъ галаз алакъаяр хъсанарун чарасуз я. И жигьетдай 1980-йисарин сиясат чешне яз къачуртIа жеда. Ихьтин фикир США-дин виликан госсекретарь Ж.Шульцан ва уьлкведин оборонадин виликан министр Уильям Перридин макъалада ава.
“Гьелелиг ядерный дяведин къурхулувал ама” макъаладин авторри фикирзавайвал, США-динни Россиядин арада жезвай цIийи къаршивилер, аксивилер 1980-йисара хьайи дяведилай агъурбур, хаталубур хьун мумкин я. И кар, абурун фикирдалди, са терефдивай муькуь терефдин ядерный системайрал кибергьужумар ийиз хьунин мумкинвилихъ галаз алакъалу я. Исятда авай сиясатдивай дуьнья “ядерный гъалатIдикай” ва я “ядерный терроризмдикай” хуьз хьун мумкин туш. Гьавиляй, виликан сиясатчийри гьисабзавайвал, Америкадин гьукумдарри Россиядихъ галаз тухузвай чпин сиясат дегишарун ва, са столдихъ ацукьна, гьалар пайгардик кухтунин месэлаяр гегьеншдиз веревирд авун лазим я.
Д.Трампани В.Путина ядерный дяведиз рехъ тагунин гьакъиндай заминвалзавай декларациядал къул чIугун лазим я.
Гуя Россия къаришмиш я
Украинадин президент Порошенкоди къейд авурвал, уьлкведин президентдин сечкийрик Россия къаришмиш хьунин вилик пад тамамвилелди кьаз хьанач. Адан гафар “РБК-Украина” чешмеди раижнава.
Порошенкодин фикирдалди, сечкийриз авур таъсирдин нетижаяр ахтармишун чарасуз я. Сечкийрик гуя Россия къаришмиш хьанва лугьузватIани, исятда авай президентди и жигьетдай гьакъикъи мисалар-делилар гъанвач.
Украинадин президентдин сечкийрин кьвед лагьай тур 21-апрелдиз кьиле фида. Халкьдин арада хабарар кьунин нетижада малум хьайивал, Зеленскийдин машгьурвал исятда авай президентдилай 30 процентдин артух я.
ШартI малумарна
Россиядин машгьур спортсмен Гьабиб Нурмегьамедова вичин Twitter-аккаунтда къейд авурвал, эгер Конор Макгрегоравай маса спортсмендин винел гъалибвал къачуз хьайитIа, гьа чIавуз ирландвидин командадивай кьисасдин бягьсинин патахъай рахунрик умуд кутаз жеда.
Мукьвара Макгрегора Нурмегьамедован кьуршахар кьунин алакьунрикай чIурукIа рахазвай кхьинар чапна. Ада Гьабиб кьуршахар кьунин жигьетдай UFC-да виридалайни хъсан спортсмен яз гьисабзавач. “Чна адан кьуршахар кьунин алакьунриз кьадардилай артух къимет гана. Кьисасдин бягьсини вири къалурда”, — кхьена ирландвиди.
Нурмегьамедова къейд авурвал, Макгрегоравай 2016-йисалай инихъ са гъалибвални къачуз хьанвач. “Сифтедай вуна са гьихьтин ятIани гъалибвал къачун герек я, анжах гьа чIавуз чун кьвед лагьай бягьсиникай рахада”, — кхьена Нурмегьамедова.
Гьазурайди — Куругъли Ферзалиев
