Вич зурба тIварарин ва наградайрин сагьиб тиртIани, Сулейманав фурс-дамах гвачир. Ам саки гьамиша халкьдин арада жедай, вични гьабурун тай, хизандай яз гьисабдай.
Сулейманаз яхдиз яргъал чкайризни физ-хквез кIандай. Патарив гвай ва яргъа хуьрерани адаз хванахваяр, танишар авай. И кар фикирда кьуна, заз и макъалада Курхуьрелай тир шаир Агъамирзоев Мирзебутаянни Сулейманан алакъайрикай куьрелди ихтилатиз кIанзава.
Сулейманаз хванахваяр ина мадни авай. Амма Мирзебутаяхъ галаз алакъа масад тир. И кар Сулейманаз кIандай, вацралай садра хьайитIани, ада Мирзебутаял кьил чIугвадай. Жегьил шаир яз, Мирзебутаяз гафунин куьмек кIан жезвай.
Мирзебутай Курхуьрел 1900-йисуз дидедиз хьана. ГъвечIизамаз, са тике фу къазанмишиз, Дербентдиз ва масанриз физ, батраквал авуниз мажбур хьана. Ада, Сулейманалай чешне къачуналди, сифте шиирар билбилдикай, къизилгуьлдикай, В.И.Ленинакай кхьенай. 1927-28-йисара “Артелдиз”, “Колхозчияр”, “Герейхановаз”, “Сулейманаз”, “ПIинийрин сувар”, “МискIин тухвайдаз” ва маса эсерар теснифнай.
Мирзебутай СтIал Сулейманан дуст тир. Шииррин куьмекдалди и дуствал мадни мукьва, мягькем хьанай. Районда са сеферда чIалар лугьудайбурун гьуьжетар (конкурс) тешкилайла, СтIал Сулейманахъ галаз Мирзебутая, НуьцIуьгъай тир Мефтялиди иштиракнай. Сулейманни Мирзебутай Махачкъаладизни фидайвал хьанай. Мирзебутаявай аниз физ хьаначир. Сулейман Агъа СтIалдал хтайла, Мирзебутая адаз шиирдалди лагьанай:
Саламар хьуй зи ширин тир мецелай,
Зун галачиз вун меркездиз фенайни?
Хабар кьур кас гьич хьаначни къецелай?
ГьикI хьана ви кIвалахар, лагь, азиз дуст?
Дагъустандин халкьарин вун арада,
Газетдай заз кIел авуна чарада.
Цуьквер цада вун фей рекье вирида,
Мад ви мурад вуч ятIа лагь, азиз дуст.
Дустуни ви дустуникай хабар кьан,
АтIанайни ви гафуни турун кьван?
Чи чилелай Шалбуз дагъ хьиз вун кьакьан,
Акваз кIан я, таб кватIа, лагь, азиз дуст.
Терсепулдай экъечIнавай цуьк я вун,
Душманарин пеле кьадай кьуьк я вун.
Чаз дагъларай вирт гъизавай чIиж я вун,
Лезги бала кIвенкIве хьана, азиз дуст.
Зулжалалди хайид я вун, гаф авач,
Чна вучин, ви дердина кас хьанач.
Вун хьтинбуруз виликрай гьич яб ганач,
Власть гила чид я лагь на, азиз дуст.
Мирзебутаяз (дустуниз) Сулеймана…
Ширин салам зи мецелай,
Хизанризни лагь кIевелай.
Хтайлахъди зун къецелай,
Зав ви кагъаз гана хьи, дуст.
Хабар кьазва зи гьалдикай,
Зи кефияр хъсан я, дуст.
За лугьун ваз меркездикай,
Куьгьне закон кана хьи, дуст.
Рахана захъ урус чIалал,
Четин хьана тийижиз чIал.
Гаф ганай заз собранидал,
Лезги чIалал раханай, дуст.
Рахана, за куьтягьайла,
Капар яна заз вирида.
Шаир яз зун хкягъайла,
Заз жегьилвал гана хьи, дуст.
Чир авуна дустни душман,
КIвалах тваха жезамай кьван!
Кьилел алаз партия жуван,
Заз тапшуругъ ганва, зи дуст.
Бутай, кIватIа фикир жуван,
Мягькем ая жуван Ватан!
СтIал шаир Сулейманан,
Чи гаф-чIал сад язва, зи дуст.
И цIарари тестикьарзавайвал, Сулеймананни Мирзебутаян арада аваз хьайи дуствилин алакъа сагъди тир. Мадни къейд авуртIа жеда: Мирзебутаяз Цлахърин хуьряй тир ашукь, буьркьуь Рагьим, Кьурагь райондин Шимихуьряй тир зурба зуьрнечи Ражабни мукьувай чидай. Абур Мирзебутаяз пIинийрин сувариз мугьман жедай, демера манияр лугьудайбурун акъажунра иштиракдай…
Райсудин Набиев
