Веревирдер авунва

Сечкийрин сад лагьай турдилай кьулухъ Facebook соцсетда авай штабдин чина Порошенкоди къейд авурвал, адаз акси ихтилатар интернетда, телевиденида гзаф лагьанва. “Дустар, за вирибурухъ яб акална — заз сесер гайибурухъни, муькуь кандидатрин тереф хвейибурухъни.  Жуван веревирдер авунва”, — малумарна ада.

Украина азад инсанрин азад уьлкве я, амма и кар патал адахъ зайиф ваъ, къуватлу президент хьана кIан­да­, — къейдна Порошенкоди. Адан фикирдалди, уьлкве­ азад Европадихъ фин ва я империядин Россиядин таъ­сирдик акатун — им ватандашрин хкягъунилай аслу я.

Украинада сечкийрин кьвед лагьай тур 21-апрелдиз кьиле фида.

Германиядик тахсир кутазва

Уьлкведин оборона патал такьатар лап тIимил кьадарда серфзавайвиляй Германия НАТО-дин хаталу­вилиз элкъведа. “BiId” чешмеди раижзавайвал, ихьтин фи­кир немсерин депутат Биджан Джир-Сарая малу­марна.

Адан фикирдалди, Германияди альянсдин икьрардал талукь тирвал ваъ, сергьятламиш хьанвай тегьерда­ ­амалзава. Тахсирдихъ галаз сад яз, ада НАТО-диз зи­ян хьунин мумкинвални авайдакай лагьана. Гьавиляй Германияди авай гьал дегишарун ва оборона­ патал харжзавай такьатар артухарун лазим я.

Чешмеди къейдзавайвал, Германиядик США-ди ва НАТО-дик квай маса уьлквейрини тахсир кутазва. Амма, НАТО-дин бине кутурдалай инихъ 70 йис тамам хьуниз талукь саммитдал терефдаррин таъсирдик акатуникди, Германияди оборонадиз харжияр артухарун хивез къачуна.

Боевикар тергна

Афгъанистандин Нангархар вилаятда махсус серенжем тухвай вахтунда террористрин “ИГ” тешкилатдихъ (ам Россияда къадагъа авунва) галаз алакъалу 70 боевик тергна. Идакай “Khaama Press” чешмеди хабар гузва­.

Нетижада террористрин яракьрин жебехана тергна. Боевикрин векилри ва терефдарри арадал атай гьалариз гьелелиг баянар ганвач. Къейдзавайвал, тIвар кьунвай регионда эхиримжи вахтара хатасузвилин дережа агъуз аватнава, гьикI хьи, террористри чпин гуьзчивилик квай мулкар гегьеншариз алахъзава.

ЛукIарай гьисабзава

Украинадин “Азадвал” партиядин виликан депутат Ирина Фариона урус чIалаз нубатдин сеферда аксивал къалурна. Ада вичин YouTube-каналдиз акъуднавай ин­тервьюда малумарнавайвал, Украинада урус чIалан халкь авач. “Урус чIалал рахазвай вирибур я лукIар я, я — маса уьлкведин чил дяведалди кьунвайбур”, — лагьана ада.

Фариона урус чIалал рахазвай ватандашриз талукь яз векъи ва туьнт гафар мукьвал-мукьвал лугьузва. Урус чIал бегенмишзавайбуруз ада билет къачун ва Россиядиз хъфин теклифна.

Гьазур я

Украинадин президентвиле кандидат Владимир ­Зеленскийди вич Россиядин президент Владимир Путинахъ галаз рахаз гьазур тирдакай лагьана. “Новости” РИА-ди хабар гузвайвал, идакай кандидатди “Украина” телеканалдай малу­марна.

Ада рагъакIидай патан векилар алай чкадал В.Путинахъ галаз суьгьбет кьиле тухун важиблу яз гьисабзава. “Чна садрани мулкар, инсанар къурбанддач. Украинадин битаввал гьа авайвал амукьун лазим я”, — къейдна ада.

Игьтиятсузвал

Тюменда са хизанди кьасухдай тушиз са шумуд миллион манат гадарна. Идакай “Наш город” чешмеди кхьизва.

Шегьерэгьлийри чпин дидедин кIвал маса гана, адахъ къачур пул лагьайтIа, са пакетда туна. Зирзибил авайдахъ галаз какадарна, а пакетни гадарна.

Пул зирзибил чара ийидай заводдиз (МСЗ) акъатна. Хизанди, заводдиз атана, чпин кьилел атай кардикай ихтилатна. Пакет жагъурун патал абур 12 тонн зирзибил  чалуниз мажбур хьана. Четинвилера гьатнатIани, абуруз пул авай пакет жагъун хъувуна.

Гьазурайди — Куругъли Ферзалиев