Чи газет кIелзавайбуруз Ишреф Жаватован тIвар фадлай малум я. Эхиримжи йисара адан макъалаяр, мезелияр, дурумлу ибараяр, халкьдин мецелай кIватI хъувунвай мисаларни мискIалар, маса эсерар газетдиз тIимил акъатнач.
Ишреф Примовича къелемдин хцивал квадарнавач, газетдихъ галаз сих алакъа хуьзва.
“Лезги газетдиз” ада вичин муаллим, тербиячи, насигьатчи, руьгьдин къул, рикIин дестек лугьузва. Им душуьшдин кар туш. Редакцияди Ишреф Жаватоваз еке ихтибар авунихъ галаз сад хьиз, чIехи гьуьрметни ийизва. Чи коллективдин теклифдалди ам Россиядин журналистрин Союздин членвиле кьабулна. Гьа чIавалай адакай чи штатдик квачир корреспондентни хьана. Ишреф Примовича чи хейлин тапшуругъар, иллаки газет кхьин тешкилдайла, ада вичин хсуси буржи хьиз тамамариз хьана.
Ишреф Жаватова кхьизвай макъалайрихъ, иллаки муаллимвилин, чIалаз ва литературадиз талукь месэлайрай материалрихъ деринвал, чIалан михьивал, девлетлувал ава. Ихьтин себебри Ишреф Примовичакай Дагъустандин ва Лезгистандин машгьур лингвист, филологиядин илимрин доктор, лезгийриз вичин метлеб садрани квахь тийидай “Урус чIаланни лезги чIалан словарь” багъишай автор М.Гьажиеван премиядин лауреатни авуна.
Лезги чIалан михьивал, цIалцIамвал хуьн патал Ишреф Жаватован кIвалах гилани тарифлуди я. Иллаки чIалан дурумлу ибараяр, мисалар ва мискIалар кIватIун, къайдадиз гъун, кIелзавайбурув, муаллимрив ва аялрив агакьарун гъвечIи кIвалах туш.
И.Жаватов Докъузпара райондин Къалажухрин хуьре 1939-йисуз дидедиз хьана. Миграгърин юкьван школа куьтягьна, ада ДГУ-дин филологиядин факультетда хайи ва урус чIаларай дерин чирвилер къачуна. 50 йисуз хайи хуьре акьалтзавай несилриз чирвилер ва тербия гана.
Хейлин йисара адакай школадин директор, хуьруьн администрациядин кьил, хайи райондин гзаф тешкилатрин активный иштиракчи хьана. Мухбирвилин везифайри ам гзафбуруз машгьурна.
Адан къелемдикай хейлин художественный эсерарни хкатна: гьикаяяр, критикадин макъалаяр ва мсб. “Лезгийрин камаллу гафар”, “Къалажух хуьруьн тарих” кьилдин ктабар яз агакьарна.
Ишреф Жаватован яргъал йисарин бегьерлу зегьмет адаз “РД-дин лайихлу муаллим”, “РФ-дин умуми образованидин гьуьрметлу къуллугъчи”, “Зегьметдин ветеран” тIварар гуналди къейднава.
Мердали Жалилов
* * *
Къуй ви къуват ЧIехи вацIун сел хьурай,
Зайифвилер гьамишалугъ хъел хьурай!
АгатайтIан теклиф тавур кьуьзуьвал,
Вуна адаз къалур мийир разивал…
“Лезги газетдин” редакциядин коллектив.
