И сеферда чна газет кIелзавайбур 2013-йисалай уьлкведин меркезда аялрин хирургвиле агалкьунралди кIвалахзавай жегьил пешекар Шагьбанов Рафик Рамазановичахъ галаз танишарда.
Рафик 1989-йисан 5-апрелдиз Тульский областдин Заокский райондин Заокский поселокда дидедиз хьана. Адан диде-бубадин ери-бине Докъузпара райондин Мискискарин хуьряй я. Рафикан чIехи буба Ражаб Шагьбанов Докъузпарада машгьур кас тир, вичин вахтунда ам РСФСР-дин лайихлу муаллим лагьай тIварцIиз лайихлу хьанай.
Рафик вад йиса авайла, хизан Дербентдиз куьч хьана. Ада 2007-йисуз шегьердин 19-нумрадин мектеб гимишдин медалдалди куьтягьна.
ГъвечIи чIавалай духтурвилин пеше хкягъунин ният авай Рафик Махачкъаладин ДГМА-дин аялрин духтуррин факультетдик экечIна, 2013-йисуз анаг яру дипломдалди куьтягьна. 2013-2014-йисара ада аялрин хирургвилин рекьяй Москвада НЦЗД-дин (Научный центр здоровья детей) интернатурада кIелна. 2014-2016-йисара ада Москвадин РМАПО-да (Российская медицинская академия последипломного образования) аялрин хирургвилин пешедай ординатурадани чирвилер артухарна. ДГМА-да кIелай йисара конкурсрани конференцийра иштиракунин нетижада къазанмишай приздин чкаяр себеб яз, вуздин эхиримжи курсуна авайла, ада президентдин стипендияни къачуна.
Рафик Шагьбанова 2016-йисалай Москвада пак Владимиран тIварунихъ галай аялрин клиникадин азарханада кIвалахна. 2017-йисалай ада Москвада РФ-дин УДП-дин ЦКБ-да (центральная клиническая больница по делам управления президента) аялрин хирургвиле кIвалахзава. Гьа са вахтунда ада 2016-йисалай Москвадин 10-нумрадин аялрин поликлиникадани икьрардалди зегьмет чIугвазва.
Вини дережадин технологиядин медицинадин куьмек гудайбуруз талукь яз тайинарнавай кьадардиз килигна, алакьдайвал куьмекар гузва. Жегьил пешекарди къейдзавайвал, гьелелиг абуруз медицинадин полисдин бинедаллаз начагъбуруз куьмек гудай ихтияр ава. Хирургиядин гзаф месэлаяр гьялунин карда Дагъустандин, гьакI маса регионрин аялризни куьмекиз жезва.
“Гьелелиг, мумкинвал авайвиляй, аялриз хирургиядин рекьяй пулсуздаказ куьмек гуз гьазур я: тайинарнавай кьадардин (квота) ва полисдин бинедаллаз”, — лугьузва жегьил пешекарди.
Пешедин рекьяй кIвалахиз пуд йис ятIани, Рафик Шагьбанова илимдин макъалаярни кхьизва. Абурукай пуд макъала аялрин хирургиядиз талукь Россиядин илимдин журналда чапнава. Гележегда адахъ медицинадин илимдал машгъул жедай, диссертация кхьидай фикирни ава.
Акьалтзавай несил патал Рафик хьтин жегьил пешекар гьар са карда чешне я. Медицинадилай гъейри, адахъ спортдани агалкьунар хьанва. Мектебда ва вузда кIелай йисара ам датIана спортдални машгъул жезвай. Азаддиз кьуршахар кьунай адакай кьве сеферда Дербентдин чемпион хьана. Гуьгъуьнлай ам Дербентда кикбоксингдални, футболдални машгъул хьана. Адахъ, кIвенкIве чкаяр кьунай ганвай дипломар, медалар гзаф ава.
Рафикан сихилда идалай виликни духтурар хьана, исятдани ава: адан ата-бубайрикай тир Шагьбанов Шихсефи вичин девирда Кьиблепатан Дагъустанда машгьур жерягь тир; ими Гьайдар Шагьбанов алай вахтунда Мискискарин азарханада кьилин духтур я. Рафик Шагьбанован уьмуьрдин юлдашдини ЦКБ-да (Москва) духтур-акушерка яз кIвалахзава.
Гатун вахтунда ада вичин бубайрин ватандал — Мискискарин хуьрелни кьил чIугвазва. Гележегда жегьил духтурдикай къуй чIехи алим хьурай.
Куругъли Ферзалиев
