Садакьадиз динда еке къимет ганва. Мугьаммад Пайгъамбардин ﷺ чIехи асгьабрикай сад тир Абузара (адалай Аллагь рази хьурай) лагьанай: “КапI — диндин даях, жигьад диндин рекье кьил я, cадакьа — зурба ажайиб шей! Садакьа зурба ажайиб шей я! Садакьа зурба ажайиб шей я!”, — асгьабди и гафар икI пуд сеферда тикрарнай. И карди, садакьадин дережа гьакъикъатдани, екеди тирди къалурзава.
Динда лугьузвайвал, гьадисрай чал агакьнавайвал, садакьа гун патал, са шейни авачтIа (яни гьакьван кесиб ятIа), гьич тахьайтIа, са хурмадин кIусуналди кьванни садакьа ая лугьузва. Эгер гьамни гудай мумкинвал авачтIа, жувалай алакьдай са куьмек гуналди (къуватдин, меслятдин) садакьа авун меслят къалурзава. Эгер са жуьредин мумкинвални авачтIа, жувакай масадаз зиян хкатдайвал хьайитIани мийир лугьузва, яни масадаз зиян тагудай уьмуьр тухуз алахъунни садакьадай гьисабзава.
Са сеферда Мугьаммад Пайгъамбардиз ﷺ Каабадин астIар (ценер) кьуна, адан хатурдай (Каабадин) Аллагьдивай са вуч ятIани тIалабзавай кас акуна. И кар акур Пайгъамбарди адаз лагьана: “Вуна ви хатурдай тIалаба, вучиз лагьайтIа Аллагьдин вилик муъминдин (иманлу инсандин) дережа вине я”.
И ван хьайи касди Пайгъамбардиз ﷺ вичихъ са нукьсан авайвиляй Аллагьдивай вичин хатурдай тIалабиз тежезвайди раижна.
Вуч нукьсан я лагьана хабар кьурла, а касди жаваб хгана: “Захъ девлет ава. Амма са касди са шей це лагьайла, заз жуван чин цIу кайиди хьиз жеда”. Яни инсанди вич гзаф шкьакь кас тирди хиве кьуна.
И гафарин ван хьайи Пайгъамбарди ﷺ адаз жаваб хгана: “Завай яргъа хьухь вун, ви цIай захъ галукь тавурай”. Ахпа Пайгъамбарди ﷺ кьин кьуна, давамар хъувуна: “Эгер вуна агъзур йисуз сив хвейитIани, агъзур йисузни капI авуртIани, шкьакь яз кьейитIа, ви чка жегьеннем я. Бес ваз чизвачни шкьакьвал — им куфр (иман тахьун) я, куфр жегьеннемда жеда. Жумартвал (гъилин ачухвал) — им иман я, иман женнетда жеда”.
Динда къейдзавайвал, кьейи касди, вичиз садакьа хгудай мумкинвал це лугьуз, Аллагьдивай тIалаб хъийидалда (яни кьейи касдиз агъа дуьньяда садакьадин дережа чир хьайила, ада вичел чан аламаз садакьаяр тагайвилин гьайиф чIугвада).
Гьуьрметлу стхаяр ва вахар! Дугъриданни, садакьадин метлеб екеди я. Эхь, виридан дуланажагъар сад хьтинбур туш. Гьавиляй ша чун жедайвал сада-садаз куьмекар гуз алахъин, кIеве авайдан гьалдикай хабар кьаз вердиш жен. ИкI чалай Аллагьни рази жеда.
Азим гьажи Панагьов, Къурушрин хуьруьн имам
