И мукьвара ММА-дай кьиле фейи Санкт-Петербург шегьердин чемпионатда иштиракай чи ватанэгьли Даир Агацарскийди 93 килограммдин заланвал авайбурун арада 1-чка кьуна. И гъалибвилин нетижада адаз ММА-дай Россиядин чемпионатда иштиракдай мумкинвал хьана.
Д.Агацарский 1996-йисуз Докъузпара райондин Мискискарин хуьре дидедиз хьана. 2015-йисуз ада Ростов шегьерда мореходный училище куьтягьна. Алай вахтунда ада икьрардин бинедаллаз Кронштадт шегьерда ВМС-дин кьушунра къуллугъзава.
Спортда Даира вичин алакьунар идалай виликни къалурнай. Адакай Астраханский областда жегьилрин арада кикбоксингдай кьиле фейи акъажунрин ва ММА-дай Шахты, Ростов шегьеррин кьве сеферда чемпионни хьана. Ам пешекарвилин женгинин самбодай кьиле фейи акъажунрин кубокдин сагьибни я.
Ростовда Даир спортдин “Легион” клубда тежрибалу тренер И.Каримован гъилик машгъул хьана. Алай вахтунда ам вичи къуллугъзавай шегьердин “Коби-Кай” спортклубда тренер М.Рядняныйдин регьбервилик кваз какахьай женгерал машгъул я.
Исятда Даира Россиядин чемпионатда иштиракуниз гьазурвал аквазва.
Куругъли Ферзалиев
