Алай йисан 31-мартдиз Ханты-Мансийск шегьерда ММА-дин какахьай женгерай Уралдин Федеральный округдин чемпионат кьиле фена. Ана 77 килограммдин заланвиляй Сургут шегьерда яшамиш жезвай эминхуьруьнви Муса Рамазанова 1-чка кьуна ва чемпионвилин тIвар къачуна.
Мусади гьеле школада кIелзавай йисара Эминхуьруьн ДЮСШ-да азаддаказ кьуршахар кьунай вердишвилер къачуна, республикада тухвай хейлин турнирра кIвенкIвечи чкаяр кьуна.
Сургутдиз фейи М. Рамазанов, азаддаказ кьуршахар кьунилай гъейри, спортдин маса жуьрейрални машгъул хьана. Кьилди къачуртIа, Муса азаддаказ кьуршахар кьунай, гъилералди кукIунай ва какахьай женгерай, женгинин самбодай Россиядин спортдин мастер, кудодай спортдин международный классдин мастер я.
Гила Муса Рамазанова алай йисан майдин сифте кьилерай Москвада какахьай женгерай кьиле фидай Россиядин чемпионатда иштиракда.
Хазран Кьасумов
