РД-дин Гьукуматдин Председателдин заместитель — образованидин ва илимдин министр Уммупазил Омаровади РД-дин образованидин ва илимдин министерстводин Аттестациядин кьилин комиссиядин (ГАК) членрихъ галаз совещание тухвана. Анал пешекарвилин сад лагьай (кьилин) категория гун патал педагогвилин работникрин аттестация тухунин нетижаяр веревирдна.
Тухвай кIвалахдин нетижаяр кьуналди, ГАК-дин членри министр конкурсдин документация (кьилди къачуртIа, грамотаяр) къалпламишунин ва аттестациядин иштиракчийрин чирвилериз дуьзугуьндаказ къимет тагунин дуьшуьшар ашкара хьанвайдан гьакъиндай хабардарна.
У.Омаровади ихьтин нагьакьан крариз рехъ гана виже къвен тийидайди къейдна ва аттестациядин серенжемар дуьзгуьндаказ кьилиз акъудунал ийизвай гуьзчивал артухарун тапшурмишна.
— Чирвилер гудай идарайрин руководителар педагогри аттестация кьиле тухун патал агакьарзавай документар керчекбур хьунив къайгъусузвилелди эгечIзава. Им виже къведай кIвалах туш. Категорияр абуруз лайихлу хьайи чIавуз гун лазим я. Аттестациядин серенжемар кьиле тухунал желбнавай гьар са касди вичин хиве гьихьтин жавабдарвал аватIа ва ийизвай вири гьерекатар, кьабулзавай вири къарарар дуьзгуьнбур, керчекбур хьун лазим тирди аннамишун герек я.
РД-дин образованидин ва илимдин министрди къейд авурвал, алава яз экспертиза кьиле тухун патал пешекаррин махсус десте тешкилда. Ада мадни малумарайвал, образованидин управленийрин начальникрин ва чирвилер гудай идарайрин кьиле авай ксарин хиве педагогри агакьарзавай документациядин керчеквилин патахъай жавабдарвал аваз жеда.
Идалайни гъейри, Уммупазил Омаровади кIватI хьанвайбурун рикIел муаллимриз комиссиядин заседанийра иштиракдай ихтияр авайди ва и кIвалахдал общественникар желб авун лазим тирди хкана.
Педагогвилин работникрин аттестация пешекарвилин кIвалахдиз дуьзгуьн къимет гунин бинедаллаз пешекарвилин сад лагьай (кьилин) категориядиз лайихлу тирди тестикьарунин мурадралди кьиле тухузвайди я.
Документар РД-дин образованидин ва илимдин министерствода графикдал асаслу яз кьабулзава. Агакьарнавай документриз пешекарвилин къимет гун патал экспертрин дестеяр желбзава. А дестейрик республикадин лап хъсан педагогар ква. Нетижаяр аттестациядин комиссиядин заседанийрал тестикьарзавайди я.
Чи мухбир
