9-апрелдиз, Дагъустан Республикадин Гьукуматдин Председатель Артем Здунов Роспотребнадзордин аппаратдин коммунальный гигиенадал гуьзчивал авун тешкилунин Управленидин начальник Тимур Мурагьимовахъ галаз гуьруьшмиш хьана. Къейд ийин, ам Роспотребнадзордин аппаратдин рабочий дестедин руководителни я. Идакай “Лезги газетдиз” РД-дин ва Кьилин Гьукуматдин Администрациядин пресс-къуллугъдай хабар гана.
Веревирд авур асул месэла республикадин цин майишатдин комплексди дурумлудаказ кIвалахун таъминарун, гьакIни и хиле кьетIен гьалариз рехъ тагунин ва абур арадал атай дуьшуьшра тади гьалда серенжемар кьабулунин макьсаддалди авуна кIанзавай гьерекатрин план туькIуьрун патал теклифар гьазуруниз талукьди тир.
Санлай къачурла, Дагъустандиз цин 18 чешме ахтармишун патал Россиядин Роспотребнадзордин аппаратдай 6 пешекар атана. Абур рабочий пуд дестедиз пай хьанва.
Абурун вилик хъвадай целди таъминардай чешме, адан патав гвай чкаяр авай гьалдин, адаз датIана авахьзавай ва я бязи дуьшуьшра гадарзавай чиркин ятарин, гьакIни яд гьикI михьи ийизватIа, гьадан гьакъиндай малуматар кIватIунин месэла акъвазнава.
Гьалариз къимет санлай вири терефар фикирда кьуна гуда. И кардал илимдинни ахтармишунардай институтрин ва маса пешекарар желбда, абуру лагьайтIа, пайда хьанвай къайдасузвилер арадай акъуддай са шумуд жуьре теклифда ва кьилди къачур и ва я маса гьалда виридалайни хъсанди хкяда.
Веревирдерин нетижаяр кьуналди, саналди тир рабочий десте тешкилунин гьакъиндай къарар кьабулна. И дестедик РД-дин Гьукуматдин Председателдин Сад лагьай земеститель Анатолий Къарибов, вице-премьер Владимир Лемешко, республикадин са жерге министерствойрин руководителар, МВД-дин РД-да авай Управленидин, РД-дин Прокуратурадин, РД-да Роспотребнадзордин ва Росприроднадзордин управленийрин векилар кутунва. Идалайни гъейри, и кIвалахдал муниципальный тешкилатрин кьилерни желбда.
«Лезги газет»
