Дуьньядиз машгьур алим Ч.Дарвина кхьейвал, инсандиз хьиз, гьайвандизни рикIин гьиссер, теспачавал хас я. А гьиссер гьатта сад-садаз ухшарни я: хъел, кичI, пашманвал, бахт, такIанвал, кIанивал, тажубвал. Къайгъударвиликай рахайтIа, гьар са гьайванди, къушра вичин шараг кIвачел акьалдарун патал вири къуватдивди женг чIугвазва. Чпин шарагрихъ лап хъсандиз гелкъвезвай гьайванрикай сад коала я. Винел патан акунрай севрез ухшар гьайван ятIани, ам и гьайванрик акатзавач.
Коала анжах Австралияда ва адаз мукьва островра яшамиш жезва. Абурун заланвал 5-14 килограмм кьван жеда. Коаладин тапасрал яргъи хци къармахар ала. Абурун куьмекдалди ам регьятдаказ тарариз акьахзава. Кенгурудик хьиз, и гьайвандикни шараг хуьдай чанта ква. Хер хьайи ва я кичI акатай коалайри аялри хьиз гьарайда. ТIуьнин еринда абуру эвкалипт тарцин бязи жуьрейрин пешер ва таза хилер ишлемишзава. Ам кагьул, гзаф юзан тийидай, са суткада гьатта 18 сятда кьван са чкадал акъваздай гьайван я. Амма, кIан хьайитIа, адалай зарбдиз катизни, хъсандиз сирнавизни алакьда.
ТIебиатда абуруз еке къурху гудай душманар са акьван авач, коаладал чIурунбуруз элкъвенвай кицIери (динго) гьужумда.
Гьазурайди — Куругъли Ферзалиев
