5-7-апрелдиз Каспийскда, Али Алиеван тIварунихъ галай спортдин ва жегьилрин дворецда, Суракъат Асиятилов рикIел хкуниз бахшна, жаванрин арада грекринни римлуйрин жуьреда кьуршахар кьунай международный турнир кьиле фида. Ана Россиядин, Гуржистандин, Эрменистандин, Къазахстандин, Азербайжандин, Узбекистандин ва Белоруссиядин хкянавай командайри иштиракда. Дагъустан вичин команда гваз экъечIда. Идакай 27-мартдиз “Дагъустан” РИА-да хьайи пресс-конференциядал адан тешкилатчийри — РД-дин физический культурадинни спортдин рекьяй министрдин сад лагьай заместитель Зайнал Салаутдинова, РД-дин кьуршахар кьунай спортдин федерациядин вице-президент, РД-дин Халкьдин Собранидин депутат Мурат Пайзулаева, жаванрин арада грекринни римлуйрин жуьреда кьуршахар кьунай Россиядин хкянавай командадин старший тренер Николай Монова хабар гана.
— И турнир чун патал лап важиблуди я. ГьикI лагьайтIа, ам неинки Дагъустандин ва Россиядин спортдин министерствойрин, гьакIни “Кьуршахар кьунай сад хьанвай дуьнья” — вири дуьньядин федерациядин календарный пландик акатзава. И акъажунра винидихъ тIварар кьунвай уьлквейрин лап хъсан жаванри иштиракда. Турнирди спортсменриз дуьньядин кIвенкIвечивал патал кьиле фидай акъажунра иштиракдай мумкинвал гуда. Гьа и кардини иштиракчияр ва чун патал адан метлеблувиликай лугьузва. Чаз и акъажунар кьуршахар кьадайбурун турниррин арада виридалайни авторитетлуди ийиз кIанзава. И кар кьилиз акъудун патал чахъ вири мумкинвилерни ава, — лагьана З.Салаутдинова.
Мурат Пайзулаева Дагъустанда грекринни римлуйрин жуьреда кьуршахар кьун цIийиз арадал хкун Суракъат Асиятилован тIварунихъ галай турнирдихъ галаз алакъалу авуна.
— Чна Дагъустанда спортдин и жуьре анжах вилик тухуз башламишайла, чаз гзаф четин хьана. Чахъ ихьтин турнир хьун заз хуш я. И карди республикада грекринни римлуйрин жуьреда кьуршахар кьун машгьурдай, цIийиз арадал хкидай ва спортсменрин арада дуствал мягькемардай мумкинвал гуда. Турнирда вичик 10 спортсмен квай Дагъустандин хкянавай команда кьилдинди яз экъечIда. Чна абурук еке умуд кутазва. И мукьвара чи кьве спортсмен уьлкведин кIвен-кIвечивал патал кьиле фейи акъажунра гъалиб хьана. Чун патал им хъсан нетижа я. Чаз гьакIни жаванрин арада грекринни римлуйрин жуьреда кьуршахар кьунай Россиядин хкянавай командадин старший тренерди Россиядин спортсменрин арада сборар Дагъустанда тухун хуш я. Заз куьн инанмишариз кIанзава хьи, турнир, адан география ва ам тухунин тешкиллувилин ери вини дережада аваз амукьун патал чалай аслу вири кIвалахар ийида, — къейдна ада.
Николай Монова грекринни римлуйрин жуьреда кьуршахар кьунай Суракъат Асиятилован тIварунихъ галай международный турнир тешкилуниз виниз тир къимет гана.
— Заз Дагъустанда международный акъажунар вини дережада аваз тешкилзавайди ва абурув лап хъсандиз эгечIзавайди къейд ийиз кIанзава. За ихьтин къимет чун физвай маса уьлквейрив гекъигна гузва. Гьакъикъатдани, хейлин уьлквейра Али Алиеван тIварунихъ галай хьтин спортдин дворец, махсус залар, спортсменар ва мугьманар кьабулунин кардани ихьтин тешкиллувал, турнирра гъалиб хьайибуруз гудай премияр авач. Заз лугьуз кIанзава хьи, алай йисуз и турнирда Россиядин кIвенкIвечивал патал Иркутскда кьиле фейи турнирда гъалиб хьайибуру ва призерри иштиракда. МасакIа лугьун хьайитIа, им Россиядин хкянавай командадин асул состав я. Суракъат Асиятилован тIварунихъ галай турнирдин нетижайрал бинеламиш хьана, Европадин ва дуьньядин кIвенкIвечивал къазанмишун патал иштиракдай команда туькIуьрда, — лагьана Н.Монова.
Акъажунар пакаман сятдин 11-даз башламишда. (Абуруз килигиз къвезвайбурувай пул къачузвач).
Шагьисмаил Гьажимирзоев
