И йикъара Дербент шегьердин кьилин библиотекадин чlехи залда Дагъустан Республикадин халкьдин артист, “Халкьарин дуствилин” ордендин сагьиб, машгьур манидар, Лезги ва Азербайжан театррин сегьнейра жанлу суьретар арадал гъайи, халкьари “Дагъустандин билбил” тIвар гайи Дагъустандин ва Азербайжандин баркаллу руш Дурия Рагьимова дидедиз хьайидалай инихъ 90 йис тамам хьуниз талукьарнавай мярекат кьиле фена. Ана лезги ва азербайжан артистри, шаирри, кьве чlаланни муаллимри, аялри ва СМИ-рин векилри иштиракна.
Мярекат шегьердин кьилин библиотекадин директор Диана Алиевади ачухна. Ада къейд авурвал, Дурия Рагьимова чи обществодин руьгьдин девлет арадал гъанвай машгьур инсанрин жергедик акатзава.
Анал рахай, мярекат тухуник кьил кутур Дербент шегьердин администрациядин культурадин ва спортдин отделдин кьилин пешекар Гуьлпери Мирзебалаевади Дурия Рагьимовадин уьмуьрдин ва яратмишунрин рекьикай суьгьбетна.
РФ-дин лайихлу артист Абдул Гьабибова, актриса Дилефруз Шихмегьамедовади ва масабуру Дурия Рагьимова чпиз сегьнедин сирер чирай муаллим, адаз театрдин вири жанраяр — къемеда, драма, трагедия — муьтIуьгъ хьайиди къейдна.
Шаирар тир Тахмираз Имамова, Азиз Мирзабегова, РД-дин лайихлу артист Мияса Мурадхановади, актрисаяр тир Эмина Вагьабовади, Фатима Фейзулаевади ва масабуру юбилярдиз бахшнавай шиирар кlелна.
Шаир Зейнаб Дербентлиди, Дурия Рагьимовадин юбилейдиз талукьарна, вичин ва адахъ галаз санал кlвалахайбурун, шаиррин, журналистрин рикlел хкунар авай ктаб акъуднавайдакай лагьана.
Актрисаяр — Севда Бейбалаевади, Дилефруз Шихмегьамедовади ва масабуру, Дурия Рагьимовадин репертуарда авай манияр лугьуналди, кlватl хьанвайбурун гуьгьуьлар хкажна.
Анал гьакlни Азербайжан театрдин директор Фирдоуси Аскеров, РФ-дин компартиядин Дербент шегьердин отделенидин 1-секретарь Пирали Пиралиев ва масабур рахана. П.Пиралиева шегьердин коммунистрин тlварцIихъай Дербент шегьердин са куьчедиз Д. Рагьимовадин тlвар гунин патахъай шегьердин администрациядиз чарар кхьейди, и месэла гилалдини гьял тавунвайди къейдна.
Мярекатдал рахай вирибуру Дурия Рагьимовадин инсанвилин дережайрикай, устадвиликайни бажарагъдикай хьиз, общественный кlвалахдикай гзаф хуш келимаяр лагьана, бегьем вакъиаяр рикlел хкана. Дурия Рагьимовадин экуь къамат, ада сегьнеда яратмишай жанлу суьретар гьамиша чи рикlера амукьдайди къейдна. Эхирдай Дурия Рагьимовадин руш Якъут Хандадашевади мярекатдиз атанвай виридаз сагърай лагьана.
Къагьриман Ибрагьимов
