Райондин администрацияда РД-дин Кьил Владимир Васильеван Чар веревирдна. И мярекатда РД-дин Халкьдин Собранидин депутат Сейфулагь Исакьова, Кьурагь райондин кьил Замир Азизова, ОВД-дин начальник Султан Къарибова, райондин кьилин заместитель Махач Хариева ва масабуру иштиракна­.

— Халкьдин Собранидиз идалай вилик ракъурайбурулай и Чар гзаф хци ме­сэлайралди важиблу я, — лагьана С.Иса­кьова. — И Чарче яшайишдин хилезни кье­тIен фикир ганва. Дагъустан Республика Россиядин регионрикай яшайишдин рекьяй лап кIанел алайвиляй, РД-дин бюджетдиз алава яз 4 миллиард ма­нат пулдин такьатар атанва. Са шумуд йис идалай вилик эцигиз башламишай Гелхенрин школа, шаз пулдин такьатар чара авуна, эцигна куьтягьна. Аладаш хуьруьн школа куьтягьун патал цIи 100 млн. манат чара авунва, Кьурагьрин хуьр хъвадай целди таъминарунизни 100 млн. манат кьван пулдин такьатар чара авунва. Къведай йисуз Гелхен дередиз газ тухуда. Алатай йисуз “100 школа” проектдай Ашарин ва Хуьрехуьруьн юкьван школаяр ремонтна. Алай йисуз “150 школа” проект кардик кутунва. Адан сергьятра аваз чи райондин вад школа капитальный ремонт авун патал документар гьазурзава. “Земский доктор” ва “Земский учитель” проектрай игьтияж авай чкаяр пешекарралди таъминарда. Районда пуд ясли- бахча эцигда. ГъвечIи карчивилел машгъул жезвайбуруз куьмек авун патал 300 млн. манат пулдин такьатар кутунва…

З.Азизова Дагъустан Республикадин Кьилин Чарче къалурнавай вири ме­сэ­лаяр кьилиз акъудиз, республикадин руководстводиз куьмек гуз гьазур тирди, налогар кIватIунай район рес­публи­када вилик жергеда авайди, инлай кьулухъни вилик эцигнавай месэлаяр кьилиз акъудун патал вири сад хьана кIва­лахдайди къейдна.

РД-дин Кьилин Чарчикай райондин Общественный палатадин председатель Фахрудин Мирзоев, КIирийрин школа-интернатдин директор Надир Тагьиров, КIирийрин юкьван школадин директор Фарман Шихкеримов, ветеринарный управленидин начальник Надир Асланов, хуьрерин поселенийрин рекьяй уполномоченный Эльмира Исаева, ­КIу­тI­ларин хуьруьн администрациядин кьил Рифет  Мурадалиев, финотделдин начальник Бахтияр Ибрагьимов, райондин образованидин отделдин начальник Ра­мазан Катибовни рахана, абуру кIватI хьанвай са жерге месэлайрикайни лагьана.

Алван Рамазанова