Сулейман-Стальский райондин администрацияда Дагъустан Республикадин Кьил Владимир Васильеван Чар веревирдна.

Райондин образованидин управленидин начальник Къачабег Аминова Чарче пешекарар гьазуруниз кьилин фикир ганвайди къейдна:

— Россиядин Президентдин Администрациядихъ галаз санал тухвай “Зи Да­гъус­тан” конкурсди чпихъ чир­вилер, алакьунар авай же­гьил пешекарриз властдин ва управленидин органриз къведай мумкинвал гана. Об­ра­зованидин хиле “100 школа” проект уьмуьрдиз кечирмишунин, 2025-йисалди школайра 3 ва 2 сменада кIва­лахун арадай акъудунин, милли чIала­рал акъатзавай учебникрин ери хъсанарунин, школайра медицинадин кабинетар лицензироватунин ва чими санузелар тадаракламишунин рекьяй гъиле кьун­вай кIва­ла­хар давамарун лазим я. И рекьерай чнани чкадал кIвалах тухузва.

Райбольницадин кьилин духтур Максим Ханбалаев медицина вилик тухунихъ галаз алакъалу, хуьруьн майишатдин ва суьрсетдин управленидин начальник Мегьамедзагьид Бабаев хуьруьн майишатдин хиле цIийивилер тунин, инвестицияр желб авунин месэлайрал акъвазна, абуру санлай Чарче къарагъарнавай теклифрин тереф хвена.

РД-дин Халкьдин Собранидин депутат Гьамидуллагь Мегьамедова Чарчихъ гьар са дагъустанви патал еке метлеб авайди къейдна.

— Халкьдин Собранидиз раиж авур Чар — им республикадин Кьили Дагъустан патал ийизвай кIвалахрин гьахъ-гьисаб я, — лагьана ада. — Государстводин по­литика агьалийрин вилик акъвазнавай месэлаяр гьялуникай ибарат я: абурун хатасузвал хуьн, агьалияр кIвалах­дал­ди­ таъминарун, къазанжияр хкажун, агьа­лийриз яшамиш жедай къулай шар­тIар яратмишун, тIем акакьдай образование ва медицинадин куьмек агакьарун. Виликан йисарив гекъигайла, 2018-йисуз районда, “100 школа”, “Къацу километрияр” ва маса проектар уьмуьрдиз кечирмишун яз, еке кIвалах тухвана. Кировский къаналдин 2-пай, Кьу­лан СтIалдал фельдшервилинни аку­шер­вилин пункт ишлемишиз вахкана. Кьилинди федеральный ва республикадин бюджетрай ахъайзавай пулунин такьатар менфятлудаказ харж авун я.

Нариман Абдулмуталибова районда РД-дин парламентдиз Владимир Васильева раиж авур Чар уьмуьрдиз кечирмишунин план кьабулнавайдакай, Чарче гьар са дагъустанвидин вилик акъваз­навай месэлаяр къарагъарнавайдакай, абур кьилиз акъуддай рекьер къалурнавайдакай лагьана.

Чар райондин хуьрера, зегьметчи коллективра, образованидин, медицинадин идарайра веревирдзава.

Хазран Кьасумов