И йикъара Дагъустандин журналистикадин векилрив залан магьрумвал агакьна: бажарагълу журналистрикай сад, хъсан шаир, дустарикай дуст, къени инсан Мегьамед Таинович Рабаданов инсульт хьана садлагьана рагьметдиз фена.
Ам дарги халкьдин векил я. Амма ада, вичин ими, Дагъустандин халкьдин шаир Сулейман Рабаданова хьиз, “Лезги газетдихъ” ва чи коллективдихъ галаз датIана дуствилин сих алакъаяр хуьзвай.
М.Т.Рабаданов 1956-йисуз Дахадаев райондин Дибгаши хуьре дидедиз хьана. Ада Москвадин государстводин культурадин институт акьалтIарна, армиядин жергейра къуллугъна. Адалай кьулухъ вич рагьметдиз фидай йикъалди республикадин “Замана” газетда отделдин редакторвиле кIвалахзавай.
Журналистикада агалкьунар адаз “РД-дин культурадин лайихлу работник” лагьай Гьуьрметдин тIвар, РФ-дин журналистрин Союздин Диплом, РД-дин журналистрин Союздин “Къизилдин лекь” премия, маса шабагьар гуналди къейднава.
Шаир яз адан гъиликай “Хвалан хатI”, “Диде-ватандин рухваяр” ктабар, цIудралди очеркар, литературадин месэлайриз талукь макъалаяр хкатна. Хейлин къуватар ада вичин имидин — Сулейман Рабаданован ирс кIватI хъувуниз, несилрив ахгакьаруниз бахшна.
Чи республикадин печатдинни информациядин министр хьайи рагьметлу Гьарун Мегьамедович Къурбановакай рикIел хкунрин ктаб кхьена.
Мегьамед Таинович кьарайсуз кас тир, адан рикIик хъийидай гзаф крар кумай. Амма…
Чна рагьметлудан хизандиз, “Замана” газетдин редакциядин коллективдиз, вири багърийриз, дустариз башсагълугъвал гузва.
Мегьамед Таиновичан экуь къамат садрани чи рикIелай алатдач.
«Лезги газетдин» редакциядин коллектив
