Сулейман-Стальский райондин экономикада уьзуьмчивили кьетIен чка кьазва. Санлай къачурла, райондин хуьруьн майишатдин карханайрихъ, лежбервилинни фермервилин майишатрихъ, арендаторрихъ 1360,7 гектар уьзуьмлухар ава, абурукай 906 гектар жегьил, амайбурни бегьердал атанвай уьзуьмлухар я. Районда йисалай-суз уьзуьмлухрин майданар ва кIватI хъийизвай бегьердин кьадарни артух жезва. ИкI, алатай йисуз районда 95,1 гектарда цIийи уьзуьмлухар кутуна ва 9253 тонн ципицIар кIватI хъувуна.
Райондин хуьруьн майишатдин ва суьрсетдин управленидин начальник Мегьамедзагьид Бабаева чаз лагьайвал, цIи карханайрин ва арендаторрин участокра ципицIрин тарифдин бегьер ава, гьавиляй районда 9500 тонндилай тIимил тушиз ракъинин кагьрабаяр кIватI хъувун планламишнава.
Районда уьзуьмчивилел машгъул тир кIвенкIвечи карханаяр ава: “Зардиян”, “ЧIереяр”, “Гуьлгери-вацI” ООО-яр, “Заря”, “Алагьвердиев”, “Н.Ягьяев” КФХ-яр ва масабур. Уьзуьмлухар арендада кьуна кIвалахзавай, гьар йисуз тарифдин бегьер кIватI хъийизвай кьилдин ксарин кьадарни гзаф я.
Районда сифтебурукай яз ципицIар кIватI хъувунив Эминхуьруьн арендаторар эгечIнава. Ингье, чун Дагъустан Республикадин хуьруьн майишатдин лайихлу работник Алимирзе Агъамирзоеван уьзуьмлухра ава. Вичи саки 30 йисуз “Аламишинский” совхозда ва “Зардиян” ООО-да уьзуьмчивилин бригададин бригадирвиле ва кьилин агрономвиле кIвалахай А.Агъамирзоеван кIвачихъ 7,5 гектар уьзуьмлухар гала, анагар чешнелу гьалда ава, дигмиш хьанвай бегьердини рикIерик шадвал кутазва.
— Захъ “Молдова”, “Ркацителли” ва “Биянка” сортарин ципицIар ава, — лугьузва арендаторди. — “Биянка” фад дигмиш жезвай сорт я, и йикъара чун абур кIватI хъувунал машгъул я. Гьар са гектардай 100 центнердив агакьна ципицIар хьун гуьзлемишзава.
Чаз малум хьайивал, ципицIар Къизлярдин коньякрин заводдиз вахкузва, Къаякентда заводдин цех ава.
ЦипицIар кIватI хъувунин карда рабочияр тир Н.Зангиев, Э.Агъамирзоева, Н.Тагьирова, Р.Мегьамедова, А.Абдулагъаева, С.Алиева, атIай ципицIар дашмиш хъувунин карда шофер А.Керимов тафаватлу жезва.
Хазран Кьасумов
