Гьар йисуз гатфар алукьайла, республикадин агьалияр хизанарни дустар галаз чуьлдал фин, анра тIуьнар гьазурун адетдиз элкъвенва. Гьелбетда, тIебиатдал фейи са дуьшуьшни цIай хъувун тавуна амукьзавач. Амма гзафбуру цIай хъийидай чка хаталуди хьуникай фикирзавач. Хъфидайла, цIай хъувур чкаяр ахтармишун, анрик цIай тун тавун рикIелай ракъурзава. Идалайни гъейри, гатфарин береда хуьруьн майишатдин кIвалахар кьилиз акъудун патални агьалияр багъ-бустандиз, чуьлдиз экъечIзава, зирзибилриз, кьурай векьериз, пешериз цIай язава. Мал-къара гваз чуьлдиз экъечIзавай ксари гьаваяр мекьи хьайи вахтара цIаяр хъийизва, амма гуьзчивалзавач… Са гафуналди, чуьлдал цIай хъийизвай гзаф дуьшуьшра чIуру гьалар арадал къвезва — чуьллер, там квай чкаяр, кул-кусар, тамар терг жезва…
ИкI тахьун патал мукъаятвал квадарна кIандач. КIвалера ва школайра гьар са аял гатфариз, гьакIни гатуз чуьлда цIай хъувунихъ авай хаталувилин, цIаяр кьунин хатасузвилин къайдайрал амал авун герек тирдан гъавурда тун лазим я.
Идалайни гъейри, пичера цIаяр хъийидай вахт (отопительный сезон) акьалтIайла, гьар са агьалиди гурмагъдин гьал ахтармишнайтIа, хъсан жедай. Эгер гьалар къайдадик квачтIа, гата амаз, пичера цIаяр хъийидай вахт къведалди, анагар дуьзар хъувуна, яни цIаяр кьунин хатасузвилин къайдайрал амална кIанда.
ЦIай кьур дуьшуьшра, мобильный телефонрин сад тир “101” нумрадиз зенгна, хабар гуз жеда. Гьар са карда мукъаят хьухь — цIай гзаф хаталу я.
У.Умаров, цIаяр кьунал гуьзчивалдай отделдин кьилин госинспектордин заместитель
