Ахцегь

Яран сувар алукьнавайдакай Ахцегьа 21-мартдин пакамахъ зуьрнечийрин дестеди, адет тирвал, КIе­лез хивелай сегьерар ягъуналди хабардарна. Спортшколадин вилик майдандал акъа­жунрин милли жуьрейрай чпин къуватар алцумзавай жегьилар кIватI хьана.

Нисинихъ далдам-зуьрнедин ван кьилеллаз В.Эмирован паркда РДК-дин гьевескар артистринни гъилера кузвай шемерни чирагъар авай жегьилрин десте пайда хьана. Яран ханума­ анал лишанлу чIехи чирагъ куь­кIуь­райдалай кьулухъ, гьава серин хьуниз килигна, суварин кьилин мярекатар РДК-дин чIехи залда давамарна. Гьа са вахтунда гъвечIи залда лезгийрин гъилин-тупIун сеняткарвилерин чешнеяр къалурзавай выставка ачухнавай.

Райондин культурадин управленидин начальник Къистер Гъаниевади районэгьлийриз сувар тебрик авурдалай кьулухъ, трибунадихъ Ахцегь райондин кьилин заместитель Роберт Гьамзаев экъечIна. Ада райондин кьил Осман Абдулкеримованни депутатрин райсобранидин председатель Абдул-Керим Палчаеван патай районэгьлийриз Яран сувар мубаракна. Ахпа УСХ-дин начальник Арген Гьажиева залда авайбуруз сувар мубаракунихъ галаз санал 2018-йисуз районди хуьруьн майишатда къазанмишай агалкьунрикай ва гъилевай йисан къайгъуйрикай суьгьбетна. КIвен­кIве­чийриз гьуьрметдин грамотаяр ва “Лап хъсан гьаят”, “Михьи куьче”, “Чешнелу багъ” но­минацийрай тешкилай конкурсрин гъалибчийриз Яран пишкешар гайидалай гуьгъуьниз РКУ-дин гьевескар артистри чIехи концерт гана.

Яран суварин шадвилер яргъал­ди­ давам хьана. Суварин мярекатар рай­ондин амай вири хуьрерани кьиле фена.

Дашдемир Шерифалиев

Кьасумхуьр

Вири халкьарихъ хьиз, чахъни суварар гзаф ава. Яран сувар лезгийрин ви­ридалайни чIехи ва рикI алай сувар я лагьайтIа, бажагьат зун ягъалмиш жеда.

21-мартдиз Кьиблепатан Дагъус­танда, гьакI гзаф маса чкайра хьиз, Кьасумхуьрелни Яран суварин шадвилер махлукьатдин еке активвал аваз, гурлудаказ кьиле фена. Сифте спортсменри гиряяр хкажунай ва яргъаз гадарунай, гьакIни цIил ялунай акъажунар тухвана.

Шад мярекатар йикъан сятдин 11-даз райондин культурадин дворецдин вилик кьиле фена. Анал кIватI хьанвай вишералди инсанри райондин кьил Нариман Шамсудинович Абдулмуталибов кьиле аваз атай райадминистрациядин жавабдар къуллугъчияр, общественный тешкилатрин векилар гурлу капар ягъуналди къаршиламишна.

Культурадин дворецдин вилик гуьрчегдиз туькIуьрнавай майдандал райондин  Готфрид Гьасанован тIварунихъ галай музыкальный школадин хордин коллектив экъечIна, ада “Дагъустан” мани устадвилелди тамамарна.

Нариман Абдулмуталибова, райондин общественный палатадин председа­тель Алимет Мейланова, агъсакъалрин Советдин председатель Фахрудин Ос­ма­нова цIай квай пекер арушнавай лашарилай харада тунвай кIарасрик цIай кяна.

Сифте гаф Нариман Абдулмуталибов рахана.

— Гьуьрметлу районэгьлияр, дус­тар!­ — лагьана ада. — Ингье чи къадим­ чи­лел нубатдин сеферда Яран сувар­ къаршиламишзава. Адахъ еке тарих ава, чи халкьди ам къейд ийиз 2000 йи­салай виниз я. Лезгийрин хуьруьн майишатдин календардалди 21-март­диз цIийи йисни алукьзава. Мадни, Яран сувар тIебиатдал чан акьалтза­вай, хуьруьн майишатдин кIвала­хар тухунив эгечIзавай вахтни я. За квез ви­ридаз и гуьзел сувар райондин депутатрин собранидин, администра­ция­дин ва кьилди жуван патай мубаракзава. Къуй квехъ гьар са карда агалкьунар, хизанра хушбахтлувал хьу­рай!­

Н.Абдулмуталибова са шумуд касдив грамотаяр, къиметлу пишкешар вахкана. Кьилди къачуртIа, Испикрин юкьван школадин математикадин тарсар­ гузвай тежрибалу муаллим Мегьамедиграми Шерифов, Россиядин Игит Радим­ Халикьован тIварунихъ галай Кьулан СтIалрин юкьван школадин музыкадин тарсар гузвай муаллим Сельминаз Алискерова райадминистрациядин гьуьрметдин грамотайриз, аялрин яратмишунрин кIвалин художественный руководитель Нариман Османов, Кьулан СтIалрин юкьван школадин художественный самодеятельностдин коллектив райадминистрациядин чухсагъулдин чара­риз лайихлу хьана, Сочи шегьердин образованидин “Сириус” центрада кьиле фейи математикадин Кьиблепатан сменада ва математикадай Пифагоран тIва­рунихъ галай­ 5-республиканский олимпиадада агалкьунар къазанмишай ЦIийи поселокдин юкьван школадин 7-классдин ученик Шамил Тагьироваз компью­тер гана.

Мярекатдал Яран сувариз талукьарна тухвай спортдин акъажунрин нетижаярни кьуна. Кьилин приз — чан алай гьер къачуниз гиряяр хкажунай 1-чка кьур Эдик Агьмедов лайихлу хьана.

Гиря яргъаз гадарунай 1-чка — Мурад Мегьамедрасулова, цIил ялунай 1-чка райондин 1-нумрадин ДЮСШ-дин командади кьуна. Абуруз, гьакIни спортдин акъажунра приздин чкаяр кьур амай спортсменризни командайриз Кьасумхуьруьн администрациядин патай пулдин пишкешар гана. Абур райондин администрация­дин спортдин, туризмдин ва жегьил­рин крарай комитетдин председатель Надир Эфендиева шад гьалара вахкана.

Яран суварин мярекат кьиле тухузвай Ярагьмед Ярагьмедова майдандиз нубат-нубатдалди манидарриз, музыкантриз, ансамблриз, аялрин кьуьлердайбурун дестейриз теклифна. ИкI, машгьур манидарар Тофик Мегьамедова — “Яран йифер”, Керим Камилова — “Бубуяр”, Дагъустан Республикадин лайихлу артист Омар Меликовани Ярагьмед Ярагьмедова — “Кьакьан дагълар”, Шихсаид Шихна­биева — “Факай мани”, Се­ли­мат Гьажиевади — “Зи намус — зи их­тибар”, Та­гьир Къадирова “Замана”, Расул Абдулкебирова “Садвал”, Азим Ризаева “Гатфар” манияр лагьана. Кьа­сум­хуьруьн 1-нумрадин юкьван школадин аялри “Гуьни” сегьне къалурна.­

Мегьарамдхуьруьн райондай атанвай симинин пагьливанри, “Си­кIерин” къаматар яратмишай Закидин Алискерова, Лезгийрин СтIал Сулейманан тIварунихъ галай муздрамтеатрдин артист Валерий Сулейманова, фольклордин “Куьре” ансамблди, райондин музыкальный школадин халкьдин алатрин ансамблди Яран суварин мярекат мадни гурлу авуна.

Хазран Кьасумов

Мискискар

Мискискарин хуьруьн центрада Докъузпара райондин хуьрери милли меденият, хуьрекар къалурунин кьилдин майданар тешкилнавай. Шад мярекатра райондин кьил Абдурагьим Алискерова,  РД-дин Халкьдин Соб­ранидин депутат Фирудин Ражабова, хуьрерин администрацийрин кьилери ва патарилай хтанвай  хейлин ватанэгьлийри иштиракна.

Мярекатдин асул пай информациядин сиясатдин ва медениятдин рекьяй Докъузпара райондин кьилин куьмекчи Исмаил Къурбанова ачухна. Ада тебрикдин сифте гаф райондин кьил А.Алискероваз гана.

КIватI хьанвайбурухъ элкъвена сувар РД-дин Халкьдин Собранидин депутат Фирудин Ражабова, РД-дин медениятдин министерстводин са отделдин начальник Минажат Мурадовади, райондин прокурор Мисбагь Назирова, Мискискарин хуьруьн администрациядин кьил Рузмедин Къенберова ва маса мугьманрини тебрикна.

Суварин мярекатрин сергьятра аваз спортдин милли жуьрейрай районэгьлийрин арада акъажунарни кьиле тухвана.

Дагъустандин Огни шегьерда кардик квай симинин пагьливанрин мектебдай атай гъвечlи пагьливанрин дестеди чпин гьунарар къалурна.

Ачух  майдандал Дагъустандин халкьдин артистка Фаризат Зейналовади, ашукь Шемшира, Гуьльмира Алиевади, Роза Чигниевади ва хейлин маса манидарри тамамарай милли манийри, аялри авур кьуьлери кIватI хьанвайбурун гуьгьуьлар шадарна.

Яран суварин шадвилин мярекатар райондин амай хуьрерани кьиле фена.

Куругъли Къалажухви

Агълабар

Дербент райондин Агълабрин хуьруьн юкьван школадани Яран сувариз талукьарнавай еке мяре­кат кьиле фена.

Школада лезги чlаланни литературадин тарсар гузвай кьилин  категориядин муаллим, РФ-дин образованидин гьуьрметлу работник Рамина Сарда­ровади гьазурнавай сценарийдин бинедаллаз кьиле тухвай мярекат пара итижлуди хьана. Ам рикlел аламукьдайди хьун патал гьам аялри ва гьамни муаллимри еке зегьмет чlугу­на. Икl, аялри Яран сувариз талукьарнавай шиирар кlелна, мани­яр лагьана, гъвечIи сегьнеяр къалурна.

Р.Сардарова кьиле аваз суварин суфраяр чи къадим тарихдин хуьрекралди (гитl, тlач, сав, натlуф, гьар жуьредин афарар ва пичlекар, кьурай як квай ва рганвай дулдурма алай хинкlарар ва мсб.) безетмишнавай. Ада  Яран суварин тарихдикай делилар гъана.

Мярекат школадин муаллимар тир Сарван Мирзаева ва Анюта Турабовади вини дережада аваз тухвана.

Къагьриман Ибрагьимов