И йикъара Мегьарамдхуьруьн райондин Къуюстанрин мектебда «Чун сагълам уьмуьрдин терефдарар я! Чун наркотикриз акси я!» лишандик кваз ачух мярекат кьиле фена. Идакай «Лезги газетдиз» райондин администрациядин пресс-къуллугъди хабар гузва.

Муаллим-психолог А.Гьуьсейновади тешкилай мярекатдиз духтур-нарколог Р.Шихрагьимова, мектебдин администрацияди ва кIелзавайбуру иштиракна. Мярекатдин вахтунда иштиракчийри наркотикри инсанрин кьисметар гьикI чIурзаватIа, инсандин сагъламвал гьикI пучзаватIа ихтилатна.

Идалай вилик районда наркоманиядиз акси комиссиядин чIехи заседание кьиле фенай. Анал наркоманиядиз аксивалунин рекьяй жегьилрин арада тухузвай кIвалахар мадни гегьеншарунин, вилик пад кьунин ва талукь тир таблигъат тухунин кIвалахар вири хуьрера тешкилунин гьакъиндай къарар кьабулна. Райондин образованидин управлениди образованидин вири идарайриз мярекатар тухунин жигьетдай чарар ракъурна.

«Лезги газет»