Алай девирда гьукуматди гзаф ксариз кьезилвилер ийизватIани, РФ-дин Президент В.В.Путина, Фе­дерациядин Собранидиз вичин Чар раиж ийидайла, кесиб ксариз, яшлубуруз, аялар авай хизанриз еке куьмекар гана кIанзавайдакай лагьанва. Ада гьакI вири инсанар, хизанар патал куьмекар гудайди къейдна. Амма вири крар са кьезилвилерал алач. Чкайрал халкьдиз къуллугъзавай ксари и кар аннамишзавач. Гзаф дуьшуьшра, герек кIва­лах туькIуьриз фейила, са юкъуз кьилиз акъатдай кIвалах са шумуд йикъал аватзава. Яшлу, ­зайиф ксар  гзаф инжиклу ийизвай дуьшуьшарни ава. Идалди идарайрин къуллугъчийри халкь гьукумдиз ихтибарсуздаказ килигуниз мажбурзава. ИкI дуьз туш, гьар са касди халкьдин кIвалахдин пата­хъай дуьз ва вахтунда жаваб гана кIанда.

И кардал гуьзчивал идарайрин регьберри авун лазим я. Виринра икI туш. Вири крар ина кIвалахзавай касдилай аслу тирди аннамишзавай работникарни ава.

Ихьтинбурукай сад Кьурагьрин МФЦ-дин пешекар  Фейзуллаева  Аф­родита  Гьабибуллаевна  я. И ида­­радин вири работникри, кIвен-кIве юрист Гьадисов Сабир аваз, чпин везифаяр намуслувилелди кьилиз акъудзава.

Амма Афродитадин кIвалах кьетIенди я. Ада милайимвилелди гъавурда твазвай къайда акурла, ву­на ам ви мукьва-кьили хьиз гьисс­да. Садра вичел хтай чарар ада тадиз иесидал ахгакьардач, ге­рек документар хкун патал тадиз хабарна, кар кьилиз акъудда. ИкI ада халкьдин патай еке гьуьрмет къазанмишзава. Афродитадиз гьилле чидач, атай кас разивилелди, чиник хъвер кваз, кIвалах туь-кIуьр­на рекье хутада.

Районда эменнидин, чилин, хизандин, паспортдин, гражданвилин ва маса вири месэлаяр МФЦ-да гьялиз жезва. Инсанриз и идарадикай еке куьмек ава. И кардал чун рази я. Амма бязи идарайра фад гьялиз жедай месэлаярни, чпин хи­вяй акъудна, МФЦ-дал ве­гьез­ва. Справка гуз ва я регистрация ийиз 10-12 югъ вахт физва, икI атун-хъфин артух жезва.

Афродита, кар алакьдай пешекар хьиз, савадлу, гъавурдик квай пе­шекарни я. Ада, Дагъустандин халкьдин майишатдин институт акьал­­тIарна — экономиствилин, гьакI­ни педагогический институтда кIел­на, психологвилин пешеяр къа­чун­ва­.

КIвалахзавай кас гьамиша вичин чирвал хкажунал машгъул хьун герек я. И кар фикирда кьунвай Аф­родитади, пуд лагьай пеше яз, Крас­нодардин многопрофильный институтда юриствилин пешедай чирвилер къачузва. Ихьтин вири терефрин пешекарди къуллугъ авунал чун гзаф шад я. Къуй адахъ мадни  агал­­кьунар хьурай.

Афродита виликдай гзаф йисара Ахцегьа, Кьурагьа ва Мегьарамдхуьре милициядин начальник хьайи, чешнелу кIвалахдин сагьиб, рагьметлу Къазиев Мирзе Гуьлмегьамедовичан хтул я. ЧIехи бубади Кьиблепатан Дагъустанда вичин чешнелу кIвалахдалди вири хуьрерин агьалийрин патай гьуьрмет къа­занмишна. Афродитадини адан рехъ давамарзава.

Афродитадин буба Гьабибуллагьа вичин уьмуьрда чирвилерин идарада зегьмет чIугуна, диде Гуьл­наз халкьдин арада гьуьрмет авай дишегьли я.

Афродита хьтин пешекардиз чи патай баркалла, аферин!

Ахьтин инсанар чи арада кьериз-цIаруз гьалтзаватIани, къуй чеб сагърай, еке дережайрив агакьрай.

Афродитадиз чна и бендер бахш­зава:

КIвалахни мез себеб яз вун

Къе халкьарин сивева.

Пехил тахьуй ви юлдашар,

Вун са чипIин винева.

 

Девлетдилай, къуллугъдилай

Халкьдин гьуьрмет еке я.

КIвалахдани, гьар са рекьяй

Вун виридлай кIвенкIве я.

 

Акьул, зигьин авай касдиз

КIвалах авун кьезил я.

Халкьдин патай баркалла ваз

Сандухдавай къизил я.

Атлухан Рагьимханов, КIирийрин хуьр