СЕГЬНЕДИН БИЛБИЛ

ТIебиатди илгьамдикай пай ганвай инсанар и дуьньядал тIимил алач: артис­тар, композиторар, журналистар, ша­и­рар, писателар ва икI мад. Чи арадай акъатай­лани, гзафбур чпин бажарагълувал себеб яз, инсанриз сейли яз амукьзава. Гьа ихьтинбурун жергедик мукьвара вичин 90 йис тамам жезвай кьве халкьдин билбил, Да­­гъустандин халкьдин артистка Дурия  Гуьлбабаевна  Рагьимовани  акат­зава­.

Дурия 1929-йисан 25-мартдиз Къуба­ райондин Хъимилрин хуьре муаллимдин хизанда дидедиз хьана. Рушан рикIе гъве­чIи чIавалай артистка хьунин мурад авай, амма кьисметди адан вилик вичин­ шар­тIар­ эцигна. Мектеб акьалтIарай руш Къубадин педучилищедиз акъатна. Анаг  акьал­тIарай 1946-йисуз ада аялрин кIва­ле муаллимвиле кIва­лахна. Гуьгъуьнлай ам Къуба райондин медениятдин кIвалин директорвиле тайинарна. Амма и кIвалах­рикай садани Дуриядин рикIиз секинвал ва архайинвал гузвачир. Адан рикI артист­вилел алай. Гьа икI и мурадди ам 1960-йи­суз Къуба шегьерда авай А.Бакиханован тIварунихъ галай драмтеатрдихъ ялна.

И театрда кIвалахай пуд йисан вахтунда ада 30-далай виниз ролар тамамарна. 1962-йисалай, Къубадин драм­теа­тр­ агалунихъ галаз алакъалу яз, Дурия Рагьимова Дагъустандин культурадин ми­ни­стерстводин теклифдалди хизанни галаз Дагъустандиз куьч жезва. Ина Дурия Гуьл­бабаевнади са йисуз радиокомитетда, 1963-1989-йисара Лезгийрин СтIал Сулейманан тIварунихъ галай госдрамтеатрда кIвалах­на, 50-далай виниз ролар тамамарна ва вишералди концертар гана. Дуриядин гьар са роль, гьар са концерт та­ма­ша­чий­ри разивилин гьиссералди кьабулна­.

Лезги театрда Дуриядин сад лагьай къамат режиссер Б.Айдаева Ш.Къиямованни М.Фаргьатан “30 кепек жерме” пьесадай эцигай тамашада тамамарай Лютфидин роль я. Гуьгъуьнлай бажарагълу артисткади Сарбикедин (Е.Никитин, “Сарбике”), Гуьлнаран (Ш.Къурбанов, “АкI тахьана, икI хьайитIа”), Дилаверан (З.Эфендиев ва Б.Айдаев, “Къазимегьа­мед”), Ла­ледин (В.Есьман ва К.Крикорян, “Лале”), Перихануман (И.Шамхалов, “Пе­риха­нум”), Шагьсенеман (Уь.Гьа­жи­бегов, “Ашукь Къариб”), Марьяман (А.Шир­ванзаде, “Намус”), Реганадин (У.Шекспир, “Лир пачагь”), Дилберан (Х.Тагьир ва Къ.Межидов, “Ашукь Са­ид”), Шафаган (М.Карим, “Варз кьур йифиз”) ва цIуд­ралди маса ролар еке устадвилелди тамамарна. Амма абурукай Перихануман ролди Д.Рагьимовади яратмишай къаматрин жергеда кьетIен чка кьазва.

Дурия Гуьлбабаевнадин зегьметдиз еке къиметни ганва.  ИкI, 1965-йисуз адаз Дагъустандин лайихлу артиствилин, 1977-йисуз Дагъустандин халкьдин артиствилин тIварар, 1986-йисуз “Халкьарин дуствал” орден гана. Дурия са шумуд сеферда Дербент шегьердин ва райондин советриз депутатвиле хкянай.

1989-йисуз Лезги театрдай экъечIай Д.Рагьимовади вичин эхиримжи нефесдалди Дербент шегьердин Азербайжан театрда режиссердин ва художест­вен­ный­ руководителдин везифаяр тама­марна.­

Дурия Гуьлбабаевна Рагьимова 2014-йисан 30-мартдиз чи арадай  акъат­на. Ада къугъвай ролар, тамамарай манияр, артисткадин экуь къамат халкьдин рикIера гьамишалугъ амукьда.

Эдуард Ашурагъаев, муаллим